«Казан» агропромпаркында экологик чиста бакча нигъмәтләре үстерергә өйрәтәләр

Хәзерге заман бакчачылары яшелчә һәм җиләк-җимешләр үстергәндә һәртөрле химикатлар куллануга каршы. 2014 елның мартыннан «Казан» агропромпаркында Россия авыл хуҗалыгы үзәгенең биологик препаратлар сату ноктасы ачылган иде. Менә шушы вакыт аралыгында гына да кешеләрнең үзләренең сәламәтлегенә карашы бермә-бер үзгәрде. Бүгенге сатып алучылар бик белемле, таләпчән. Чыннан да, булган мөмкинлекне нигә кулланмаска? Белгечләр, фән эшлеклеләре бүген безгә зарарлы препаратлар кулланмыйча да бер дигән уңыш алу мөмкинлеген тәкъдим итәләр.

- Мин үзем, гомумән, нәни генә бакчасында үзе, балалары һәм оныклары ашыйсы ризыкка ниндидер химик ашлама сипкән кешеләрне аңламыйм, - ди Нурия Фәйзрахманова.

Нурия ханым 36 ел үсемлекләрне саклау тармагында хезмәт иткән. Лаеклы ялга чыккач та, үз эшен дәвам итеп, «Казан» агропромпаркында Россия авыл хуҗалыгы үзәгенең биологик препаратлар сату ноктасында сатучы-консультант булып эшли. Мондый тәҗрибәле белгеч бакчачылар өчен үзе бер табыш. Кай­чан карама: аның янында халык булыр, ул һәркемгә игътибарлы, сабыр, аңлата, күрсәтә.

- Бакча уңышларын җы­еп бетерер көннәр җитә, киләсе ел уңышын кайгыр­тып нинди эшләрне башкарып калу кыйммәт? - дип сорадым Нурия ханымнан.

- Биологик препаратлар белән эшләү зур сабырлык һәм табигатьне күрә, тоя белүне сорый. Шәхси бакча ел саен мул уңыш бирсен дисәгез, сез аны яратырга, сакларга тиеш. Бүген халык бездән «Триходермин» ала. Бу препарат туфрактагы гөмбә авырулары белән көрәшә, зарарлы личинкалардан котылырга ярдәм итә. Аның белән эшкәрткәннән соң, бакчага берәр төрле бөртекле культура чәчсәгез дә була. Ул чүп үләннәреннән азат итә һәм җирне ашлый. Бу - бодай, арыш, арпа, горчица. Горчица зарарлы бөҗәкләрдән, гөмбә, черек авыруларыннан, чүптән арындыра, туфракны кабарта. Аны бер сезонга өч тапкыр чәчәргә була. Уңышны җыеп алгач та чәчәсез, иртә яздан да җир кардан арынуга төп культураны чәчкәнче горчицаны тишелдереп алырга мөмкин. Дачаларда, шәхси йортларда көз көне кимерүчеләр арта. Алардан да вакытында котылырга, хәстәрен күрергә кирәк.

Нурия ханым аз гына вакыт эчендә дә һәрнәрсәне кайгыртып, киңәшен биреп өлгерә.

- Сәламәтлегегезне саклагыз, экологик чиста ризык­лар гына ашагыз, - диде ул, саубуллашып.