Мәктәпкә букча сайлыйбыз: нәрсәгә игътибар итәргә?

Уку елы башы якынлаша, димәк, мәктәп гардеробы һәм кирәк-яраклар сатып алу өчен иң «кайнар» чор җитте. Казан федераль университеты белгечләре букча сайлау һәм аны тутыру буенча киңәшләре белән уртаклаша. 

Фундаменталь медицина һәм биология институтының хирургия кафедрасы укытучысы, табиб-ортопед Илдар Сәлахов билгеләп үткәнчә, әлеге аксессуарны сайлаганда иң мөһиме – бала өчен уңайлылык. Конструкциягә килгәндә, аның ике нык лямкасы һәм ортопедик каты арткы өлеше булырга тиеш. Кагыйдә буларак, букча шәхси параметрларга көйләнә. 

-    Ул авыр булырга һәм балага басым ясарга тиеш түгел. Дәреслекләр аркага артык йөкләнмә бирмәсен өчен, арткы өлеше каты булган букча сайлап алу яхшырак, – ди И.Сәлахов. 

Букчаны бер җилкәдә йөртү җитди ортопедик авырулар үсешен китереп чыгармый, әмма гәүдә торышына турыдан-туры йогынты ясый, дип билгели табиб. 

-    Рюкзак балага дизайн буенча ошарга тиеш һәм аны бала белән бергә сайларга киңәш ителә, югыйсә ул аны киюдән баш тартырга мөмкин. Шул ук вакытта күп төрле кесәле һәм күләмле брелоклар асылган зур модельләрдән качарга кирәк. Сатып алганда, букчаның А4 форматындагы китаплар һәм дәфтәрләр сыйдырырга тиешлеген дә онытмыйбыз, - дип искәртә КФУ Психология һәм белем бирү институтының башлангыч белем кафедрасы доценты Ләйсән Каюмова. 
Сүз уңаеннан, 1 августтан мәктәп рюкзаклары буенча ГОСТ үз көченә керде. Киңәшләрдән күренгәнчә, аксессуарлар җитәрлек дәрәҗәдә җиңел, физик йогынтыга чыдам булырга һәм төссезләнмәскә тиеш. Аерым алганда, кече сыйныф укучылары өчен букчаның авырлыгы, этикеткаларны һәм эшләнмә комплектына кергән өстәмә элементларны исәпкә алмыйча, 700 граммнан артмаска тиеш. Югары сыйныф укучылары өчен букча авырлыгы күп дигәндә 1 килограмм тәшкил итәргә тиеш. Моннан тыш, рюкзак контраст төсләрдә эшләнергә, яктылыкны кире кайтара элементлары булырга тиеш. Шулай ук мондый эшләнмәләрнең ышкылуга, ә алар эшләнгән тукыма буяуларының тир тәэсиренә чыдамлыгы нормативлары кертелә.

Кече звено укучыларына дәресләр уңайлы булсын өчен үзе белән нәрсәләр алырга кирәк соң? Ләйсән Каюмова ачыклык керткәнчә, рюкзакны җыйганда авырлыкны истә тотарга кирәк –аның 3,5-4 килограммнан артмавы шарт 

-    Төп дисциплиналар өчен 12 битле дәфтәрләр сатып алырга киңәш итәбез. Төсле тышлы 24 битле дәфтәрләр нинди генә матур булмасын, алар өстәмә авырлык һәм башлангыч мәктәп укучысы өчен туры килми. Бик зур күләмдә кирәксез канцелярия товарлары булган зур пеналларга да ихтыяҗ юк. Башлангыч сыйныф укучысына тәкъдим ителә торган кирәк-яраклар: бер-ике гади ручка, гади карандаш, бетергеч, очлагыч, 6 төсле карандаш һәм 15 сантиметрлы линейка, - ди Ләйсән Каюмова.
 

Гүзәл Камалова әзерләде.