Ни өчен баллы әйбер ашыйсы килә?

Диета тота башлап, углеводлардан тулысынча баш тартсагыз, иртән каһвә генә эчсәгез яки төшке ашны бөтенләй ашамасагыз, организмыгыз кирәкле калорийны алмый башлый һәм энергияне тулыландыру өчен кәнфит яки шоколад ашыйсы килеп китә. Моның өчен дөрес тукланырга, яшелчә һәм җиләк-җимеш, бөртеклеләр, майсыз ит ашарга кирәк.   

Шикәр урынына ясалма балландыргычлар куллансагыз да, берәр тәмле әйбер ашыйсы килү барлыкка килергә мөмкин, чөнки ул шикәр кебек энергия бирми. Кирәкле күләмдә калорий җыелмагач, баллы тәм-том ашыйсы килә. Шуңа да шикәр алыштыргычлар кулланганчы, бераз гына баллы әйбер ашап куегыз.     
Хроник стресс аркасында да шикәр күп ашала. Димәк, кәнфит ашаганчы, стресстан котылу юлларын эзләргә кирәк була. Берәр яраткан кул эшенә тотыныгыз, спорт белән шөгыльләнегез, йога һәм медитациянең дә файдасы бар.   

Аз йоклаучылар да баллы әйбер ярата. Стресс кичергәндәге кебек, бу вакытта грелин дигән гормонның күләме арта.
Шикәр авыруы барлыкка килмәдеме икән? Гел ашыйсы килә теләге булса, баллы әйберне күп ашасагыз, су күп эчсәгез һәм бәдрәфкә еш йөрсәгез, табибка күренегез, ул сезгә глюкозага кан анализын бирергә кушачак.

Фото: https://pixabay.com