Аккош күлендә төрле халык ризыкларын авыз итәргә мөмкин булачак

Узган ялларда, әйтик, меңләгән кеше «Казан» гаилә үзәге янындагы «Тәмле Казан» чарасында сыйланды.
26 нчы августта Аккош күлендә өченче гастрономия фестивале узачак. Былтыр ул ике тапкыр – җәй һәм көз көне узган иде. Быел аны җәйнең соңгы шимбәсендә үткәрергә булганнар.

- Иртәнге 10нан башлап без Акккош күлендәге мәйданга күпсанлы кунакларны көтәбез. Монда фудтраклар урнаштырылачак, спорт активлыклары оештырылачак, шеф-поварлардан мастер-класслар тәкъдим ителәчәк, балалар өчен махсус зона булачак. Катамаран һәм сапбордлар арендага алырга мөмкин. Мәйданга кадәр шатллар хәрәкәте оештырылачак. Куркынычсызлык мәсьәләләре, гадәттәгечә, беренче урында. Шуңа күрә халыкны махсус рамкалар аша үткәреп, тикшереп кертәчәкләр, - диде Киров һәм Мәскәү районы администрациясе районы башлыгы урынбасары Денис Сугоняко.

Гастрофест булгач, тәм-том ягы беренче урында. Фуд-кортта 35 җәмәгать туклануы вәкиле Идел буе халыклары, Европа, Паназият, Мексика, Италия һәм Кавказ ашлары тәкъдим итәчәк. Кунаклар татар милли ризыклары, Мексика бурритосы, Америка бургерлары, француз сырлары, кыздырылган туңдырма, үзбәк тәм-томнары, итальян пиццалары һәм башка бик күп ризыклар авыз итеп карый алачак. 

Концерт программасы да әзерләнгән. Концертның хедлайнерлары рок-җырчы, «Смысловые галлюцинации» төркеме лидеры Сергей Бобунец һәм DRUMMATIX төркеме булачак.