Кыргыз көрәше буенча дөнья чемпионатында Татарстан көрәшчеләре катнашамы?

Билгеле булганча, бу ял көннәрендә Татарстанда көрәш буенча яшьләр арасында дөнья беренчелеге, дөнья чемпионаты белән берлектә, кыргыз көрәше буенча да дөнья чемпионаты узачак. Татарстан көрәшчеләре соңысында катнашырмы икән дигән сорау туды. «Шәһри Казан» хәбәрчесенә үз чыганаклары хәбәр иткәнчә, татар көрәше буенча дөнья чемпионатында катнашкан көрәшчеләр кыргыз көрәш буенча бәйгедә дә чыгыш ясаячак. Тиешле квалификациясе булган көрәшчеләр дә керер мөмкиндер әле анда.

Хәбәр иткәнебезчә, көрәш буенча Россия җыелма командаларының икесендә дә Татарстан көрәшчеләре катнаша. Яшьләр арасындагы командага Фазыл Сибгатуллин, Илгизәр Хәмидуллин, Камариддин Саидганиев, Әмир Хәсәнов, Булат Шакиров, Данил Әүхәдиев, Аяз Хәйретдинов чакырулы. Өлкәннәр арасындагы җыелма командага исә Татарстаннан Азат Габдрәшитов, Ранис Гыйләҗетдинов, Илнар Закиров, Рафаэль Кәлимуллин, Ренас Кәлимуллин, Илфат Миннегалиев, Булат Мусин, Радик Сәлахов, Ислам Фәлахов чакырылган.

Иртәгә, ягъни шимбә көнне яшьләр арасындагы дөнья беренчелеген тәмамлап, олылар арасындагы бәйгедә дә өченче урынны алучыларны ачыклаганчы дәвам итәчәк. Якшәмбе көнне инде кыргыз көрәше буенча дөнья чемпионаты узачак. Ә ике көрәшнең дә финал ярышлары Миңгәргә планлаштырылган.

Уртак спорт чаралары Татарстан Рәисе Рөстәм Миңнеханов һәм Кыргызстан президенты Садыр Жапаровның Халыкара Көрәш федерациясе һәм Халыкара кыргыз көрәше федерациясе арасында хезмәттәшлек турында меморандум нәтиҗәләре буенча уздырыла. 

Көрәш буенча дөнья чемпионатының абсолют авырлык категориясендә җиңүче Татарстан Республикасы Рәисе Рөстәм Миңнеханов бүләге – автомобильгә ия булачак.