Татарстан умартачылары бал кортларының яңа нәселен булдырмакчы

Рязань өлкәсе Рыбное шәһәрендә узган умартачыларның бөтенроссия киңәшмәсендә билгеле булганча, Татарстан умартачылык өлкәсендә сезон нәтиҗәләре буенча икенче урынны алган. Бәяләмә бирү өчен селекция эшен, умартачылык продукциясен җитештерүнең күләмен, бал кортлары гаиләләре санын исәпкә алганнар. Бу сезонда Татарстанда 6 мең тонна чамасы бал җитештерелгән. Бал кортлары гаиләләре 5 меңгә арткан. Моннан тыш, Татарстан умартачылары бал кортларының яңа нәселен булдыруга керешкән, ул «Татарстанская» дип аталачак.