5,5 мең студент транспортта йөрүгә грант алачак

Бу зачет-имтиханнар тапшыруда бурычлары булмаган, яхшы билгеләргә укыган, актив социаль тормыш алып барган егетләр һәм кызлар. Авыр тормыш хәлендәгеләр дә игътибарсыз калмый. Әмма грантка дәгъва итүчеләр арасында иң лаеклы 5,5 меңе генә җиңүче булачак. Бәхетлеләр исемлеге инде ел ахырына төзелеп бетәчәк.

Студентлар үзләренә транспортта йөрүне ташламалы итәргә сорап, бик еш мөрәҗәгать итә. Мәскәү, Санкт-Петербург үрнәк итеп китерелә. Әмма бүгенгә барлык студентларга мондый мөмкинлек бирү республика көченнән килми. Барлыгы Татарстанда 240 меңнән артык студент белем ала, димәк, барысының транспортта йөрү чыгымнарын каплау өчен бик саллы күләмдәге акчалар таләп ителә. Әмма уйлый торгач, чарасы табылган, 2011 елдан республикада Транспорт гранты программасы гамәлгә кертелгән. Шул рәвешле иң лаеклыларга һәм матди хәле авыр булганнарга транспорт чыгымнарының бер өлешен каплыйлар. 

-Транспорт гранты гамәлгә кертелгәндә, аның бюджеты 30 миллион иде.  2019 елдан күләмен 60 миллионга кадәр арттырдык. Бу грантның шартларын да камилләштерергә тырышабыз. Узган елда без транспортта йөргән сумманың бер өлешен кире кайтару – кэшбек формасын сынап карадык. Әмма студентларга бу ошап бетмәде. Республиканың кайбер шәһәрләрендә шәһәр транспорты челтәре үсеш алмаган бит. Быел без яңа форматны сайладык, - дип сөйләде Татарстан яшьләр эшләре министрының беренче урынбасары Софья Галиева-Мостафина.

Быел Транспорт грантына ия булучыларның барысына да Ак Барс банкның “Татарстанда яшәүче картасы” тапшырылачак. Бу картага ай саен, каникул вакытларыннан тыш, билгеле бер күләмдә акча күчерелеп барылачак. Казан өчен бу сумма зуррак – аена 1,5 мең тирәсе, гомуми суммасы – 11 мең.  Түбән Кама, Чаллы, Әлмәт, Алабуга студентлары – 9 айга бүлеп 10 мең, башка районнарда белем алучыларга 9 мең сум күчереләчәк. Бу акчаларны теләгән максатларга – таксига да, шәһәрара автобус, электричкаларда түләүгә дә, шәһәр эчендә йөрүгә дә тотарга мөмкин. Транспорттан файдаланмаганнар исә акчаны башка кирәк-яракларга да сарыф итә ала.