Бөтен җитәкчеләрнең кан басымын үлчәгәннәр

Муниципалитет бинасында акцияне үзәк хастаханә хезмәткәрләре оештырган. Йөрәк-кан тамырлары авырулары үсеш алу куркынычын ачыклау максатыннан табиблар һәр җитәкчедән анкеталар тутырткан. Һәрберсенә профилактика буенча тәкъдимнәр бирелгән. 

Барлыгы кан басымын 50 кеше үлчәткән, 55% очракта югары кан басымы ачыкланган. Аларга кызыл карточкалар бирелгән һәм үз терапевтына мөрәҗәгать итәргә киңәш ителгән.

Халык сәламәтлеге темасы планеркада да дәвам иткән. Анда район үзәк хастаханәсенең баш табибы чыгыш ясаган. Ул үз сәламәтлегеңә һәм хезмәткәрләрнең саулыгына сакчыл мөнәсәбәт кирәклеген, диспансерлаштыру мөһимлеген ассызыклап уза. Быел диспансеризацияне 7,5 меңнән артык мамадышлыга узарга кирәк, 72%ы инде тикшеренергә дә өлгергән. Кайбер авыл җирлекләре планны 100 %ка диярлек үтәгәннәр. Калган җирлекләргә бу юнәлештә эшне көчәйтү һәм эшне төгәлләү бурычы куелган.