Казан танк училищесы башлыгының элеккеге урынбасарын үтергән кеше ачыкланган

Казан танк училищесының элеккеге башлыгы урынбасары Валерий Хахинны үтерүдә таксист булып эшләүче шикләнелә. Бу хакта үзенең телеграм-каналында Россия Эчке эшләр министрлыгының рәсми вәкиле Ирина Волк хәбәр итте.

Җинаять 8 сентябрьдә килеп чыга. Бу көнне полициягә Хахинның хатыны мөрәҗәгать иткән һәм аның ире дүрт сәгатьтән артык элемтәгә чыкмавы турында белдергән. Өстәвенә, фатирларының ишеге бикле булган.