Студент кызларга декрет пособиеләрен ун тапкырга күтәрергә тәкъдим ителгән

Хезмәт министрлыгы көндезге бүлектә укучы Россия студентларына декрет пособиеләрен төбәккә карап 74,9–235,4 мең сумга кадәр арттырырга тәкъдим иткән. Бу хакта «Известия» газетасы ведомство эшләгән закон проектына сылтама белән хәбәр итте.

Министрлык пособиене исәпләү кагыйдәләрен үзгәртергә тәкъдим итә, аның күләме хәзер стипендиягә бәйле, ә ул уртача аена 2-5 мең сум тәшкил итә. Студент кызларга декрет акчаларын федераль һәм төбәк бюджетларыннан белем бирү оешмалары түли. Шулай итеп, яшь әниләр 9,3–23,3 мең сум ала ала.

Закон проекты тарафыннан пособие күләмен студент яши торган төбәктә хезмәткә сәләтле халыкның яшәү минимумының 100 процентка кадәр арттырырга һәм стипендияләр суммасын исәпкә алмаска тәкъдим ителә.

«Известия» басмасына Хезмәт министрлыгы матбугат хезмәтендә хәбәр итүләренчә, документны Дәүләт Думасына язгы сессиягә кертү планлаштырыла. Проект Президент кушуы буенча эшләнгән һәм өстенлекле тәртиптә кабул ителергә мөмкин, ә үз көченә инде сентябрьгә керергә мөмкин, дип фаразлана.