Сулык янында уйнау фаҗига белән тәмамланган

4 апрель төнендә Бөгелмә районының Подгорный бистәсендә Солояз елгасында 2014 елгы малайның гәүдәсе табыла. Бу хакта Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.

Ачыкланганча, һәлак булган бала кичен дуслары белән елганың биек ярында уйный һәм ниндидер бер мизгелдә күздән югала. Балалар баштан аны үзләре эзләп карый, таба алмагач, ярдәм сорап өлкәннәргә мөрәҗәгать итә.

Полиция хезмәткәрләре волонтерлар белән бергә эзләү эшләрен оештыра һәм Солояз елгасында баланың гәүдәсен табалар.

Россия Гадәттән тыш хәлләр министрлыгының ТР буенча Баш идарәсе кисәтә:

– балаларны караучысыз калдырма;
– балаңның кайда йөргәнен бел;
– әгәр бозда яки сулык янында балаларны күрсәгез, бу хакта 112гә хәбәр ит!
– балаларның су янында уйнау омтылышларына юл куймаска кирәк.