#Кыскача яңалыклар 01 август 2024, 09:34

Укытучыларга йөкләнеш арта бара

01 август 2024, 09:34

Россиядә укытучыларга йөкләнеш артуы күзәтелә һәм укучылар саны күбәюе белән бәйле рәвештә ул алга таба да үсүен дәвам итәчәк.

Скопировать ссылку

Әлеге проблеманы хәл итү өчен өстәмә финанслар җәлеп итү кирәк булачак, дип белдергәннәр РАНХиГС матбугат хезмәтендә.

Президент академиясенең өзлексез белем бирү икътисады үзәге тикшеренүе күрсәткәнчә, 2016 елдан 2023 елга кадәр чорда мәктәп укучылары саны арту (+18,3%) сыйныфлар санының (+8,7%) һәм укытучылар санының (+0,1%) тиешле үсеше белән компенсацияләнмәгән.

Укытучыларга йөкләнешнең артуы педагог һөнәренең абруен күтәрүгә юнәлдерелгән чараларның нәтиҗәлелеген киметергә мөмкин, дип кисәтә белгечләр.

“2025 елга кадәр укучылар саны ишәюе фаразлана. Бу сәбәпле, укытучыларга һәм инфраструктурага йөкләнеш тә артачак. Сыйныфлар санын арттыру кирәк булачак, димәк, сыйныф җитәкчелеге өчен айлык акчалата түләүләргә дә, белем бирү шартларын камилләштерүгә дә өстәмә финансларга ихтыяҗ туачак”, - диелә тикшеренүдә.

2025 елдан соң гомумбелем бирү системасына демографик йөкләнеш кимиячәк, әмма аерым территорияләрдә йөкләнешнең артуы дәвам итүен дә исәпкә алырга кирәк.

Кызыклы яңалыкларны күзәтеп бару өчен безнең МАХ каналына кушылыгыз.