Рөстәм Миңнеханов Кайбыч районында эш сәфәрендә булды

Язгы кыр эшләре биредә март ахырында башланган. Чәчүлек мәйданнары - 36 мең га. Кайбыч районы чәчүне беренчеләрдән булып төгәлләгән. Хәзерге вакытта терлек азыгы әзерләү актив бара. Район җитәкчелеге сүзләренә караганда, Сабантуйга кадәр беренче чабымны бетерү бурычы тора.

Ульянково авылы янында Рөстәм Миңнехановның хуҗалыклар җитәкчеләре, инвесторлар һәм авыл җирлекләре башлыклары белән гадәттәгечә очрашуы узды. Татарстан Рәисе шәхси ярдәмче хуҗалыкларны үстерү мәсьәләләренә аерым тукталды. Бүген районда шәхси ярдәмче хуҗалыкларда 1500 баш терлек исәпләнә. Рөстәм Миңнеханов халыкны терлекләрнең баш санын арттыруга актив этәрергә кирәклегенә игътибар итте. Шулай ук ул ат асрауны үстерү буенча шундый ук программа әзерләү турында да хәбәр итте.

Аннары республика Рәисе «Август Агро» ҖЧҖнең 3700 баш савым сыерына исәпләнгән терлек комплексында булды. Объектны 2023 елның августында төзи башлаганнар. Гомуми егәрлеге - 4460 терлек урыны. Комплекс 2026 елның беренче кварталында тулыланыр дип көтелә. Проект куәтенә чыкканда сөт җитештерү 45 мең тоннага җитәргә тиеш, тәүлеклек күләме - 123 тонна.

Рөстәм Миңнехановка технология, шулай ук хәзер башкарыла торган эшләр турында сөйләделәр. Аерым алганда, объектта терлекләр астына салу өчен түшәм склады һәм компостлау мәйданчыгы төзелә. Файдалануга тапшыру октябрь ахырына планлаштырылган.

ТР Рәисе Матбугат хезмәте