1 октябрьдән хәрбиләрне һәм хәрби пенсионерларны сөенечле яңалык көтә

Элек фаразланган 4,5 процент урынына хәзер 7,6  процент дәрәҗәсендә инфляция көтелә, шуңа бәйле рәвештә өстәмә индексация үткәрелә дә. Әлеге мәгълүматлар федераль норматив хокукый актлар порталында урнаштырылган һәм хәзерге вакытта РФ хөкүмәтенә җибәрелгән.

Проектны Россия Оборона министрлыгында әзерләгәннәр. Индексация 2025 елның 1 октябреннән булыр дип планлаштырыла.

Индексация өчен тәкъдим ителә торган коэффициент 1,076 тәшкил итәчәк. Элегрәк 1,045 күрсәткече гамәлдә булган, бу 4,5 процентка артуны күздә тоткан. Түләүләрне арттыруның яңа шартларына затларның киң даирәсе кагылачак:

контракт буенча хәрбиләр;
чакырылыш буенча хәрбиләр;
милли гвардия хезмәткәрләре;
полиция хезмәткәрләре;
җинаять-үтәтү системасы хезмәткәрләре;
мәҗбүри башкару органнары хезмәткәрләре;
федераль янгынга каршы хезмәт хезмәткәрләре;
таможня органнары хезмәткәрләре;
федераль фельдъегер элемтәсенең башлыклар составы затлары.

Карар проекты шулай ук элеккеге хәрбиләр һәм көч органнары хезмәткәрләре өчен пенсияләрне автомат рәвештә арттыруны күздә тота. Түләүләр күләме шулай ук 7,6 процентка артачак.

Искәртәбез, элегрәк Владимир Путин "Россия Федерациясе Кораллы Көчләре ихтыяҗлары өчен әйберләр сатып алу үзенчәлекләре турында"2025 елның 11 августындагы 551 номерлы Указга кул куйган иде. Бу документ хәрби форма җитештерүгә яңа таләпләр куя. 2026 елдан РФ Кораллы Көчләре ихтыяҗлары өчен китерелә торган барлык кием формасы Россия оешмалары тарафыннан эшләнергә тиеш. 2027 елга Россия җитештерүе турындагы таләпләр форма тегү өчен кулланыла торган материалларга да кагылачак (тукымалар һәм трикотаж тукымалар, алар шулай ук Россия территориясендә җитештерелергә тиеш).