Акча өчен күп балалы гаиләне яндырырга маташканнар

Тикшерүчеләр версиясе буенча, җинаятьнең максаты — бизнесменның керемнәрен үз кулына алу булган. Бу хакта Россия Тикшерү комитетының Татарстан буенча Тикшерү идарәсе хәбәр итте.

Бер гаиләне ике тапкыр уттан коткарганнар

Вакыйга 2016 елның июлендә Актаныш районы авылларының берсендә башланган. Билгесез кешеләр эшкуарның хатыны һәм өч баласы белән яшәгән шәхси йортка ут төрткән. Янгынны күреп алган күрше хатыны гаиләне уяткан. Алар вакытында йорттан чыгып өлгергән. Шуннан соң гаилә башка йортка күчкән. Әмма ике атнадан соң яңа йортка да ут төрткәннәр.

Бу юлы бизнесменның хатыны янгын вакытында уянган һәм гаилә әгъзаларын уяткан. Нәтиҗәдә алар янә йорттан вакытында чыгып котылган. Ул вакытта ут төртүчеләрне ачыклау мөмкин булмаган.

Шикләнелүчеләрне еллар узгач ачыклаганнар

Тикшерү барышында алынган шаһит күрсәтмәләре хокук саклау органнарына җинаятьтә катнашучыларны ачыкларга ярдәм иткән. Тикшерүчеләр версиясе буенча, ут төртүләрне бизнесменның бертуган энесе һәм аның танышы оештырган.

Ведомство мәгълүматларына караганда, бизнесменның туганы абыйсын һәм аның гаиләсен юк итеп, аның керемнәрен үз кулына алырга ниятләгән. Хәзер җинаять эше буенча тикшерү тәмамланган. Материаллар судка җибәрелгән. Шикләнелүчеләрнең гаеплелеге суд тарафыннан билгеләнәчәк.