«Балалар моны күреп үссен»: Фирдүс Тямаев сайлауга уллары белән килгән

Җырчы сайлау участогына уллары Раян һәм Кәрим, шулай ук үз төркеме белән килгән.

Фирдүс Тямаев өчен сайлаулар — балачактан ук бәйрәм кебек истә калган көн. Ул әти-әнисе белән сайлау участогына йөргән елларын сагынып искә алды.

— Мин кечкенә чакта әти-әни сайлауларга йөри иде. Безнең өчен бу зур бәйрәм булды. Иртәдән мәдәният йортында музыка уйный, без, балалар, кичкә кадәр концертлар куя идек. Әниләр клубка җыелып коймак пешерә, самавыр куя иде, — дип сөйләде җырчы.

Еллар узган, әмма Тямаев өчен сайлау көненә булган мөнәсәбәт үзгәрмәгән. Хәзер ул үзе дә бу традицияне балаларына күрсәтергә тели.

— Бүген мин генә килмәдем, Раян белән Кәрим улларымны да алып килдем. Алар моны күреп үссеннәр өчен. Төркемемдәге егетләрне һәм кызларны да үзем белән алдым, — диде ул.

Җырчы сайлауларның ил тормышындагы мөһим вакыйга булуын да билгеләп үтте. Ул Россиягә тынычлык теләвен һәм махсус хәрби операциядә катнашучы егетләрнең исән-сау өйләренә кайтуын теләде.

— Мин махсус хәрби операция зонасына 20 тапкыр бардым, иң алгы позицияләргә кадәр барып җиттем. Андагы хәлне үз күзләрем белән күрдем. Илгә тынычлык телим. Сайлаулардан соң сугышлар тәмамланып, егетләребез исән-сау әйләнеп кайтсын иде, — дип белдерде Фирдүс Тямаев.

Аның сүзләренчә, Татарстанда тыныч тормышны, татар телен һәм традицияләрен саклау да мөһим. Шулай итеп, Фирдүс Тямаев өчен бүгенге сайлау көне берьюлы берничә мәгънәгә ия: балачак хатирәләрен яңарту, гаилә традициясен дәвам итү һәм улларына үз үрнәген күрсәтү.