Чыгарылыш имтиханнарының беренче нәтиҗәләре сөендерәме?

Кайберләрне алынган баллары сөендергәндер, кайберләрне – көендергәндер. Гомумән алганда быел химия һәм рус әдәбиятыннан уртача баллар былтыргыга караганда бераз түбәнрәк. Тарих буенча нәтиҗәләр аз гына яхшыртылган.

Химия буенча БДИны 2394 чыгарылыш сыйныф укучысы тапшырган (2025 елда – 2154). Өч укучы имтиханны җитди сәбәпләр аркасында тәмамлый алмаган һәм алар 22 июньдәге резерв көнендә имтихан тапшырачак.

Химия буенча уртача балл 66,88 тәшкил иткән (2025 елда – 69,43). 100 балл җыючылар саны – 67 кеше (2,8 процент), узган ел мондый нәтиҗәгә 114 укучы ирешкән иде. Имтиханның минималь 36 баллык чиген 205 катнашучы (8,56 процент) үтә алмаган.

Рус әдәбияты буенча БДИны 725 укучы тапшырган (2025 елда – 644). Уртача балл 72,08 булды (2025 елда – 74,22). 100 балл җыючылар саны – 64 кеше (8,83 процент), ә узган ел алар 80 булган. Минималь 32 балл чиген 11 катнашучы (1,52 процент) үтә алмаган.

Тарих буенча БДИны 1486 чыгарылыш сыйныф укучысы тапшырган (2025 елда – 1404). Ике укучы имтиханны җитди сәбәп белән тәмамлый алмаган һәм 23 июньдәге резерв көнендә имтихан бирәчәк.

Тарих буенча уртача балл 61,50 тәшкил иткән (2025 елда – 60,91). 100 балл нәтиҗәсенә бер генә укучы ирешкән, бу күрсәткеч узган елдагы белән бер дәрәҗәдә калган. Минималь 32 балл чиген 66 катнашучы (4,44 процент) үтә алмаган.

БДИ нәтиҗәсен яхшыртырга теләүчеләр бер предметтан кабат имтихан тапшыра алачак: химия һәм рус әдәбияты буенча – 8 июльдә, тарих буенча – 9 июльдә. Әмма бу очракта беренчел нәтиҗә гамәлдән чыгарылачак.