Татарстан 2028 елда Күчмә халык уеннарын кабул итәчәк

Чарада ТР Премьер-министры урынбасары Ләйлә Фазлыева, ТР Спорт министры Владимир Леонов, Казан шәһәре Башкарма комитеты җитәкчесе урынбасары Азат Абзалов, шулай ук VI Бөтендөнья Күчмә халык уеннары чемпионнары һәм Татарстан җыелма командасы спортчылары Адель Макарова, Илфат Миңнегалиев һәм Глеб Голов катнашты. 

«Бөтендөнья күчмә уеннары — спорт турниры гына түгел. Бу — традицияләрне саклау, алга омтылу, көч, ихтыяр һәм җиңү. Күптән түгел Кыргызстаннан кайткан чемпионнарыбыз турнирда тәкъдим ителгән спорт төрләренең чын ихтыяр көчен, матурлыгын күрсәтте. Мин сезгә хәерле юл һәм бары тик җиңүләр генә телим», — диде Ләйлә Фазлыева.

Владимир Леонов исә Татарстан алдында зур бурыч торуын билгеләп үтте. Аның сүзләренчә, 2028 елгы уеннар спорт белән генә чикләнмәячәк — алар милли мәдәният һәм халыкларның традицияләре белән дә бәйле булачак.

«Безнең өчен бу зур сынау. Күчмә халыклар уеннары спорт белән генә түгел, милли идентификация, мәдәният белән дә бәйле. Шуңа күрә бурычыбыз — бу хәрәкәткә мөмкин кадәр күбрәк кешене җәлеп итү», — диде министр.

Алда — федераль һәм республика оештыру комитетларын формалаштыру, ярышлар программасын эшләү һәм уеннарны үткәрү урыннарын билгеләү. Леонов Татарстанның төрле районнарында кунакларга республика табигатен һәм мәдәниятен күрсәтерлек мәйданчыклар булдырырга ниятләүләрен әйтте.

Исегезгә төшерәбез: VI Бөтендөнья Күчмә халык уеннары 31 августтан 6 сентябрьгә кадәр Кыргызстанда узды. Уеннар тәмамланганда эстафета Татарстанга тапшырылды — VII Уеннарны 2028 елда Татарстанда үткәрү планлаштырыла.

Татарстан спортчылары да Кыргызстандагы ярышларда уңышлы чыгыш ясады: Россия җыелма командасы составында республикадан сигез спортчы катнашып, алыш, көрәш һәм армрестлинг буенча биш медаль яулады.