Татарстан мөфтие: «Телефонны көн саен билгеле бер вакытка сүндереп куярга кирәк»

Очрашулар һәм дискуссияләр циклы

Татарстан Диния нәзарәтендә мөселман яшьләре һәм барлык теләүчеләр өчен яңа Лекторий сезоны башланган. Беренче очрашуда Камил хәзрәт Сәмигуллин баш миен һәм хәтерне яхшырту, белемне арттыру һәм Коръәнне ятлау турында сөйләгән.

• 15 сентябрьдә, рабигыль-ахыр аеның 4 нче көнендә, Татарстан Диния нәзарәтендә яңа Лекторий сезоны ачылган. Бу — мәшһүр дин галимнәре, мөселман экспертлары, активистлар һәм җәмәгатьчелек вәкилләре белән көнүзәк темалар буенча очрашулар һәм дискуссияләр циклы.

Яңа сезонның беренче кунагы Татарстан Республикасы мөселманнары Диния нәзарәте Рәисе, Татарстан Мөфтие, курра-хафиз, шәригать фәннәре докторы, «Мөхәммәдия» мәдрәсәсе директоры, Нәзарәтнең Голәмәләр шурасы рәисе Камил хәзрәт Сәмигуллин булган.

Мөфти үз чыгышында һәрьяклап камилләшү ысуллары, баш миен һәм хәтерне яхшырту, белемне арттыру һәм Кәлам Шәрифне ятлау турында сөйләгән. Ул Пәйгамбәр Сөннәтендәге алымнар белән уртаклашкан, шулай ук заманча технологияләр һәм гаджетларга да тукталган. «Ясалма фәһем, телефон һәм интернет — ул бары тик мөмкинлек кенә, һәм алардан үзеңә зыян китерми генә, дөрес файдаланырга кирәк», — дигән Камил хәзрәт.

Мәгълүмати «тынлык» кирәк

Ул көн саен смартфоннарны билгеле бер вакытка сүндереп куярга, гаджетларны чамасын белеп кенә кулланырга киңәш иткән. Мөфти фикеренчә, мәгълүматны үзләштерү һәм истә калдыру өчен кешегә вакыт-вакыт мәгълүмати «тынлык» кирәк. Камил хәзрәт фикерне туплау һәм хәтерне күнектерүнең мөһимлеген дә билгеләп үтте. Ул баш миен мускул белән чагыштырып, аны даими күнектерергә кирәклеген әйтте.

«Баш мие дә — үзенә күрә мускул ул. Әгәр дә аны яхшыртып тормасаң, ул көчсезләнә һәм зәгыйфьләнә башлый. Шуңа күрә гел текстлар ятларга, хәтерне яхшыртырга һәм игътибарны тупларга өйрәнү мөһим», — диде ул.

Очрашуда Коръән ятлау темасына да аерым игътибар бирелде. Камил хәзрәт Пәйгамбәрнең күп кенә сәхабәләре Коръәнне 40 яшьтән соң ятлый башлавын, алар арасында 60, 70 һәм хәтта 90 яшьлекләр дә булуын сөйләде.

• Лекторийда аралашу әдәбе, социаль челтәрләрдә һәм мессенджерларда үзеңне дөрес тоту, әңгәмәдәшең белән әдәпле сөйләшү һәм үз фикереңне ачык итеп җиткерү мәсьәләләре дә күтәрелде.

Чыгыштан соң катнашучылар мөфтигә көнүзәк сорауларын бирде. Алар гакыйдә, дога кылу, шәригатьтә музыканың рөхсәт ителү-ителмәве, хәләл һәм көндәлек тормышның башка яклары турында фикер алышты. Алдагы Лекторий очрашулары турында Татарстан мөселманнары Диния нәзарәте сайтында һәм MUSLIMMOL каналларында танышырга мөмкин.