Татарстанда кайбер белгечләргә 500 мең сум түли башларга мөмкиннәр

Хәзерге вакытта коррупциягә каршы экспертиза уза торган проект нигезендә, 2027 елның 1 гыйнварыннан башлап яшь белгечләргә бер тапкыр 500 мең сум күләмендә акча биреләчәк.

Программа авыл җирлегендә ветеринария хезмәтен үстерүгә юнәлдерелгән. 500 мең авыл торак пунктларының дәүләт ветеринария берләшмәләрендә (район административ үзәкләреннән тыш) эшләргә теләк белдергән 35 яшькә кадәрге белгечләргә биреләчәк. Ел саен алты яшь профессионалга шундый финанс ярдәм күрсәтергә планлаштыралар.
Кандидатларга төп таләпләр: Россия гражданы булу, профильле югары яки урта һөнәри белемле булу һәм җирле ветеринария берләшмәсенә рәсми рәвештә эшкә урнашу.

Болай гына ярты миллионны алу мөмкин булмаячак. Программаның төп шарты – Татарстан Министрлар Кабинетының Баш ветеринария идарәсе, конкрет ветеринария берләшмәсе һәм белгеч арасында өч яклы килешү төзү.
Яшь белгеч оешмада кимендә өч ел өзлексез эшләргә тиеш.