Тиенгә сохари ашата күрмәгез

Без дә аларны сыйлаганда, нәрсә ашатырга ярый-юк икәнен белеп торырга тиешбез, дип кисәтә Татарстанның Биологик ресурслар буенча дәүләт комитеты белгечләре. 

Тиеннәрне әстерхан һәм эрбет чикләвеге, кыздырылмаган көнбагыш һәм кабак төшләре (берьюлы биргәндә биштән артмасын), кабыклы фундук белән сыйларга мөмкин. Алар яңа өлгергән һәм киптерелгән алма, груша, банан, шулай ук яшелчәләр – кишер һәм ташкабакны да яратып ашыйлар. Миләш һәм карлыган, күрәгә, инжир, йөзем, кара җимешне дә үз итәләр. Пешкән йомырка ашатырга була.

Ә менә миндаль, арахис, пестә (фисташка), цитруслылар һәм кыздырылган, тозланган ризыклар, ачы ризыклар, кипкән бәрәңге, сохарилар һәм икмәк-күмәч эшләнмәләре катгый тыела. Куркынычсызлыкны да истә тоту мөһим.Тиеннәр – авырулар эләктерә торган кыргый хайваннар, шуңа күрә аларны кулдан ашатмагыз, сыйпамагыз. Сый-нигъмәтне җимлектә яки җирдә калдырыгыз. ашатканда алар белән турыдан-туры элемтәгә кермәгез.

Белешмә:

Республикада тиеннәрнең саны тотрыклы – 4,1 мең баш тәшкил итә. Аларның иң күбесе Саба, Нурлат, Аксубай һәм Яшел Үзән районнарында яши.