Украина мошенникларының җинаятьтәшләре Татарстанда тоткарланган

Бу хакта Россия Эчке эшләр министрлыгының рәсми вәкиле Ирина Волк хәбәр итә.

Оперативниклар элемтә узеллары челтәренең эшчәнлеген туктаткан, шулар аркасында Украинадагы мошенниклар безнең гражданнарны алдалау мөмкинлегенә ия булган.

Җинаятьчеләр россиялеләргә чит илдән шалтыратканнар һәм оператор белән килешүне озайту сылтавы белән дәүләт хезмәтләреннән керү кодларын сораганнар. Шуннан соң алар россиялеләр исеменнән кредитлар һәм микрозаймнар рәсмиләштергәннәр, һәм заем акчаларын кире кайтару өчен акчаларны янәсе имин  счетларга күчерергә таләп иткәннәр.

Гыйнварда полиция хезмәткәрләре мошенникларның кәрәзле телефоннары Татарстанда теркәлгәнлеген ачыклаган. Аннары республикага аноним куратор күрсәтмәсе буенча башка төбәкләрдән килгән ике кешенең яшәү урыннары билгеләнгән. Мессенджердагы белдерүләр буенча алар акча эшләргә теләүчеләрне җыйганнар. Тентүләрдән соң фатирлардан сим-банклар, 2,7 меңнән артык сим-карта, компьютер техникасы һәм элемтә чаралары алынган.