«Узып баручылар, кем җырлый дип, Резидәнең кассетасына чиратка тезеләләр иде»

"Бер хәтирә искә төште. 1998 еллар якынча. Минем әле Закирны бөтенләй белмәгән чакларым. Мин Казанның Җиңү Проспекты базарындагы аудио, видео касеталар сату буенча киң таралган Союз студиосында эшли идем. Касета 6 сум вакытлар. Закир һәм "Заман егетләре" Резидәнең беренче "Бураннарга каршы барам" исемле альбомын яздырып халыкка тәгъдим  иткән вакытлар. Безнең Союз студиосына да, сату нокталарына да  килеп җитте ул альбом. Альбомда иң беренче җыр - "Синсез гомер гомер түгел ул".

Мин иң әйбәт сатучылардан санала идем. Аудио магнитофонга Резидәнең "Синсез гомер гомер түгел ул" дигән җырын куеп җибәрә идем. Резидәкәй беркемгә дә охшаман тавышы белән  күңелләргә кереп бәгырьләрне айкарлык итеп сузып җибәрә иде шушы җырны. Ул җырны Резидә башкаруында хәзер ишеткәнем булмады, ә менә ул вакытта күңелнең иң түренә кереп калып гел колакта чыңлап тора... Шул җырны эзләп табып тыңлый башласам, шул чорга, үземең 22-23 яшьлек чорыма кайтам төсле. Бәлки хәтерлисездер.
"Син миннән ерак киткән чакта,
Ак яулыгың болгап юл алдың.
Юл буенда басып калдым ялгыз,
Югалттым мин сине, югалттым.
Син мине сагындыңмы, дидең,
Синсез яшәү — яшәү түгел ул.
Син мине көтәсеңме, дидең,
Синсез гомер — гомер түгел ул".

Узып бара торган халык, барыр җиреннән туктап, "Кем җырлый?" дип әллә ничә кассета алып китәр иделәр. Чират тезелә иде. Көнгә 100дән артык, алай гына да түгел, бик күп сатыла иде кассеталары. Ә кем уйлаган шушы җырчы кайчан да булса минем дә сүзләремә җырлар башкарыр дип тә, бер казанда кайнарбыз дип. Ул вакытта әле мин бөтенләй шигырь язмый идем. Закирны да белми идем. Үз дөньям иде... Эх… Резидәкәйнең урыннары җәннәттә булсын", - дип язган ул.