Җәлилчеләр батырлыгын искә алуны һәм Туфан Миңнуллинның туган көнен ничек уздырачакбыз?

Бу коточкыч җинаятьтән соң, 81 ел узса да, халык бәгырендәге бу тирән яра бүген дә сулкылдый. Менә быел да бу көнне нәкъ 12дә башкалабызның 1 Май мәйданында җыелып Җәлил һәм аның көрәштәшләрен дә, гомумән, Бөек Ватан сугышында шәһит киткәннәрне хәтердә яңартачакбыз. Бөек Җиңүнең 80 еллыгында гына түгел, беркайчан да безнең исәннәрнең аларны онытырга хакыбыз юк. Быел әлеге чараларда яшьләр дә катнашачак. “Безнең батырлар” конкурсына йомгак та шунда ясалачак. Җәлилнең кызы Чулпан ханым да ул көнне Казанда булыр дип көтелә. Каһарманнарыбызны искә алу көне иртүк сәгать 10да Җәлил музей-йортында булачак. Анда җәлилчеләр эзләре буйлап йөргән әдипләрнең чыгыш ясавы көтелә. Ә кич белән филармониядә “Шагыйрь һәм музыка” дигән зур концерт та булачак. 

Шул ук көнне 90 ел элек тагын бер бөегебез Туфан Миңнуллин да дөньяга килгән. Гүя табигать бер милләттән берьюлы шулкадәр күп шәхесләрен алганга уңайсызланган да 9 елдан соң тагын бер зур шәхес бүләк иткән. Туфан ага үзе дә моны гел белеп, тоеп, шуннан илһам алып яшәгән кеше. Җәлилчеләрнең үлмәс батырлыгына багышланган “Моңлы бер җыр”ны язуы юкка гына түгел бит инде. 

Татарстан Язучылар берлеге ике елга бер драматурглар семинары үткәрүне матур традициягә кертеп җибәрде. Аны Данил Салихов башлап җибәргән иде. Быелгысы аның Туфан ага юбилеена багышлана. Билгеле инде, каләмдәш дуслары, чордашлары Туфанның туган авылы Олы Мәрәтхуҗага да барып нигез туфрагында дога кылачак. 

Ә кич белән Камал театрының яңа бинасында “Күзлек” балалар театр лабораториясенә йомгак ясала һәм “Апуш” театрының яшь артистлары Туфан Миңнуллинның “Авыл эте – Акбай” пьесасын күрсәтәчәк. Болар хакында без журналистларга матбугат конференциясендә Татарстан Язучылар берлеге рәисе Ркаил Зәйдулла, Татарстан республикасы Мәдәният министры урынбасары Ленар Хәкимҗанов Һәм Республика яшьләр оешмасы рәисе Диләрә Дамар сөйләде. Ә без сезгә җиткерәбез. Барыгыз, күрегез, шундый бөек шәхесләрне биргән милләт баласы булуыгыз белән горурланыгыз!