Мәкерле үлем алып киткәнгә дә алты ел булган инде

Менә бүген 1август та чын-чынлап Татарстанның халык шагыйре Роберт Миңнуллин көне булды. Исән булса аңа 77 яшь тулган булыр иде. Мәкерле үлем алып киткәнгә дә алты ел булган инде. Ә менә исеме, шигырьләр-җырлары исән. Шагыйрь үзе язганча. “Җырны үтереп булмый”. Бу шигырь  Роберт Миңнуллин исемендәге Республика балалар китапханәсе уздырган искә алу кичәсендә Рамай Вафин башкаруында аеруча тәэсирле яңгырады.  Моны  олысының-кечесенең алкышлары дәлилләде. Без, кунакларны, чакырырга була ул, алар шагыйрьгә хөрмәт күрсәтеп, чакырмыйча да килерләр. Ә менә каникулда  балаларны китапханәгә җыю бер дә җиңел эш түгел. Үз эшләрен, балаларны яратучы хезмәткәрләр монда да җаен тапкан. Китап яратучы күп балалы гаиләләрне дәшкәннәр. Тәнзилә Галимуллина өч кызы: Самира, Ралина һәм Диана белән килгән. Бүген әниләрен туган көне белән котлап, кызлар берсеннән берсе остарак итеп Р. Миңнуллинның ”Әни кирәк” дигән шигырен яттан сөйләделәр. Моннан да шәп бүләк була димени әни кеше өчен? 

 Алисә ханым  Ибраһимова әни булырга җыенган, авырлы чакта Роберт  Миңнуллинның  шушы шигырен укый һәм кызына да исемне Таңсылу дип сайлый.  Таңсылу  зур инде, бу чарада шагыйрьнең “Кызыма” дигән  шушы шигырен сөйләде.  Музыка мәктәбе укытучысы Гөлнара Галиева шагыйрьнең халык арасында киң таралган җырларын яңгыратты. Аларны бергәләп тә  җырладык.  

Әлеге кичәдә очраклы кеше юк иде,  шуңа да бик җылы, җанга рәхәт булды ул. Ким Миңнуллин, Рафис Корбан һәм  Йолдыз Шарапова бу сөйкемле талантлы кешелекле шәхес белән таныш булганга шатлыкларын да яшермәделәр, якты хатирәләре белән уртаклаштылар.  Әниләре белән килгән балалар әлеге китапханә ишеген ешрак ачарга кирәк булыр дигән карарга килеп киткәннәрдер. Анда аларны бусагадан ук мыеклары да елмая торган  шагыйрь дөньяны яратырга өндәп тора.