Яңа “Ана теле” искесеннән нәрсә белән аерыла?

Платформа үзебезнең серверларга күчкән һәм яңартылган интерфейс алган.

“Ана теле” проекты 2014 елда ТР Рәисе Рөстәм Миңнеханов кушуы буенча бюджет хисабына эшләтеп җибәрелгән иде. Аны булдыруга үз вакытында халыкара тел мәктәбен җәлеп иттеләр. Шул рәвешле “Ана теле” татар телен өйрәнү өчен төп онлайн-мәйданчыкка әверелде. Әмма 2023 елда аны булдыручы чит ил компаниясе Россиядән китте, ресурс үз мәйданчыгын югалтты һәм эшләүдән туктады. 

Шул вакытта проектны яңадан, инде үзебезнең ил платформасына күчереп, яңадан эшләтеп җибәрү кирәклеге турында сөйләшүләр башланды. ТР Финанс министрлыгы моңа 123 млн сум бүлеп биргән. Ике ел дигәндә туган телебезне өрәнү ресурсын үзебезнең серверларга күчереп, яңадан эшләтеп җибәрә алдылар. Бүгенге көндә “Ана теле”ндә 1,3 мең кеше теркәлгән. Әмма Татарстан мәгариф һәм фән министрының урынбасары Минзәлия Закирова сүзләренчә, тулы көченә ресурс бу көннәрдә генә эшли башлаган һәм алга таба кулланучылар саны бермә-бер артыр дип көтелә. Теркәлүчеләр саны чикләнмәгән. Аңа Татарстанда яшәүчеләр дә, республикадан читтә яшәүчеләр дә кушыла ала.

-Заманча таләпләрне исәпкә алып, контент яхшыртылды, интерфейс яңартылды, системаның мобиль версиясе эшләнде, ЕСИА аша теркәлү һәм эшләү мөмкинлеге өстәлде, - дип сөйләде «Прогресс» оешмасы башкарма директоры Эдуард Балдаков.

«Ана теле» онлайн мәктәбендә телне 9 дәрәҗәдә өйрәнү каралган. Һәр бүлектә дәресләр, фото-видеоматериаллар урнаштырылган. Алга таба укытучылар белән дәресләр уздыру мөмкинлеге кертү дә ниятләнә. Әлегә ресурс өч телдә эшли, әмма Кытайдан яки гарәп илләреннән татар телен үзләштерергә теләүчеләр күбәеп китсә, бу телләрдә эшләүне дә кертеп җибәрү мөмкин.