“Мәктәпкә җыенырга ярдәм ит”: букча кемгә тиешле?

2007 елдан башлап 277 меңнән артык беренче һәм 2-11 сыйныф укучысы “Мәктәпкә җыенырга ярдәм ит” акциясе ярдәмендә мәктәп кирәк-яракларына ия булган. Аз керемле, күпбалалы гаиләләр, тәрбиягә бала алучылар, инвалид бала тәрбияләүчеләр, әтиләре махсус хәрби операциядә булганнар өчен уку елы башына саллы гына ярдәм бу. Быел шул рәвешле якынча 5 меңлек мәктәп җыелмасы бүләк ителәчәк. 18 ел эчендә барлыгы бу максатларга 405 миллион сумнан артык акча тотылган.

Быел да, августка аяк басуга, традиция буенча “Бердәм Россия” Башкарма комитеты бинасында башлангыч бирделәр. Бу эшкә республиканың төрле районнарында да  тотындылар. Ярдәмгә мохтаҗлар исемлекләре барлана, барлык мәктәп кирәк-яраклары кергән букчалар сатып алына. Балаларны тәрбияләү, өстәмә белем бирү һәм укучыларга психологик ярдәм күрсәтүне үстерү идарәсе башлыгы Айгөл Кашапова районнар җитәкчелеген букчаларның ГОСТ таләпләренә туры килүенә игътибарлы булырга чакырды. Иң төп таләп – беренче сыйныфлар өчен аның авырлыгы 700 граммнан, 2-11ләрнеке 1 килограммнан артмаска тиеш.

Агымдагы елда акция кысаларында мәктәп букчалары белем йорты бусагасын беренче тапкыр атлаучы 7 меңнән артык малай һәм кызга тапшырылачак. 2-11 сыйныфтагыларга 30 меңнән артык мәктәп җыелмасы бирәчәкләр. 

-    Без еш кына керем күләменә игътибар итәбез, элеккеге исемлекләргә карыйбыз. Ә бит гаилә елдан-елга, бер сентябрьдән икенче сентябрьгә кадәр генә яшәми. Гаиләнең яңа проблемалары, мәшәкатьләре, сораулары туарга мөмкин. Кайдадыр әти яки әни кеше авырып китәргә, кайдадыр башка проблемалар килеп чыгуы бар. Безгә мөрәҗәгатьләр быел бик күп, “Бердәм Россия” партиясенә 2394 кешедән гариза алынды. Бу без теркәп куйган гаиләләргә өстәп. Барыннан бигрәк Менделеевск, Түбән Кама, Бөгелмә һәм Казаннан. Һәр мөрәҗәгатьне бик игътибарлап карарга һәм мөмкин булганча ярдәм итәргә чакырам, - диде Дәүләт Думасы депутаты Татьяна Ларионова.