“Сәләт”кә көчле көндәш үсеп килә

Быел “Апуш”лыларга республиканың башка районнарыннан да балалар кушылды. 117 бала Әтнә районы Каенсар урманнарына иҗади лагерьгә җыелды. 16 көн дәвамында балалар һәм остазлар Туфан Миңнуллин әсәрләренә башка күзлектән караганнар, лаборатория дә шуңа “Күзлек” дип атала.

– “Апуш”ка инде өч ел. Аны популярлаштыру, төрле районнарга чыгару турында фикерләр килеп иреште. Без башта иҗади лагерь эшләп карарга булдык. Төрле районнардан килгән балаларны театр сәнгате белән “агуландыру” төп максатыбыз булды. Миңа калса, без максатыбызга ирешү юлында. Без Татарстан рәисе Рөстәм Миңнехановка, Телләр комиссиясе рәисе Марат Әхмәтовка, әлбәттә, Мәдәният министрлыгы һәм Әтнә районы хакимиятенә бик рәхмәтле. Бу көнне бөтен мәгълүмат чаралары Туфан абый турында сөйли, төрле чаралар уза. Әмма, минемчә, ул үзе исән булса, Туфан абый өчен иң кадерле чара менә шушы чара булыр иде. Чөнки ул балалар яратты, үзенең әсәрләренә төрле карашны да теләп кабул итте. Туфан абыйның рухы шат булсын, – диде “Апуш”ларның әнисе, Казан шәһәре башкарма комитетының социаль мәсьәләләр буенча урынбасары Гүзәл Сәгыйтова.

Аның сүзләрен Россия Дәүләт Думасы депутаты Илдар Гыйльметдинов та хуплады.

– Туфан абый белән бик якын аралашкан кеше. Без якташлар, бер районнан. Кечкенә вакыттан ук Туфан абыйның уйларын, фикерләрен ишетеп үстем. Дөрестән дә, балаларның татар телендә менә шулай матур итеп сәхнәдә чыгыш ясаулары аның өчен бик кадерле булыр иде, – диде.

“Апуш” лагерендә әйдаманнар ролен “Апуш” белән күптән таныш балалар башкарды. Бу яктан “Апуш” лагере күпләргә таныш “Сәләт” лагеренә охшап калган. “Сәләт”кә көчле көндәш үсеп килә дияр идем, әмма алар күбрәк теләктәшләр, дуслардыр. Максатлары, бурычлары да охшаш.

“Апуш”лылар Туфан Миңнуллин әсәрләренә нигезләнеп 4 эскиз әзерләде. Мәхәббәт, нәфрәт кебек катлаулы хисләргә кыска һәм оста гына аңлатма бирделәр. Легендар драматургның “Әлдермештән Әлмәндәр” әсәренә кайтып, балалар: “Без бит Әлмәндәр кебек яши дә белмибез”, – диде. Ни кызганыч, сүзләрендә хаклык бар. Бәлки, кемнәрдер балалар өчен бу әсәр бик катлаулы дияр. Дөрес, әмма балаларга ал күзлекләр аша тәрбияләгәнче, Туфан Миңнуллин күзлеге аша үстерү хәерле.