Түбән Кама театр сәнгате үзәгенә әйләнәчәк
Түбән Камада 27 марттан 4 апрельгә кадәр өченче тапкыр “Россиянең нефть, газ һәм химия шәһәрләре театрлары атналыгы” узачак.
Түбән Камада 27 марттан 4 апрельгә кадәр өченче тапкыр “Россиянең нефть, газ һәм химия шәһәрләре театрлары атналыгы” узачак.
8 шәһәр, 15 спектакль, 3 мәйданчык һәм танылган актерлар... Түбән Камада 27 марттан 4 апрельгә кадәр өченче тапкыр “Россиянең нефть, газ һәм химия шәһәрләре театрлары атналыгы” узачак.
Театраль тамашалар шәһәрнең өч мәйданчыгында: халык иҗаты йортында, Туфан Миңнуллин исемендәге драма театрында һәм “Җәлил” театр комплексында узачак.
“Нәкъ менә Түбән Каманың нефть, газ, химия шәһәрләре арасында театр сәнгате үзәгенә әверелүе сөендерә. Яшьләр театр дөньясына күбрәк тартылса иде”,– дип ассызыклап узды матбугат конференциясендә Халык иҗаты йорты директоры Илнур Сәгыйтов.
Искәртеп узарга кирәк, әлеге фестивальдә катнашучылар арасында Кәрим Тинчурин исемендәге Татар дәүләт драма һәм комедия театры да бар. Алар “Туган-тумача” спектакле белән беренче тапкыр гастрольгә чыгачаклар. Матбугат конференциясендә исә К.Тинчурин театры актерлары Артем Пискунов белән Резедә Сәләхова да катнашты һәм театр атналыгына карата үз фикерләрен белдерде.
“Томск, Пермь, Мәскәү, Дзержинсктан театрлар киләчәк. Алар ничек яшәп ята, сәхнә әсәрләрен ничек куя? Барысын да әлеге атналыкта белербез. Тамашачы чит шәһәрләрдән килүче театрларны күрү мөмкинлеген ычкындырмыйча, мәдәни диапазонын киңәйтсә иде”,– ди Артем Пискунов.
“Түбән Камада яшәүче театр сөючеләрдән көнләшәм хәтта, чөнки фестиваль программасы бик бай. Кайчан әле бу шәһәрләргә барып, театр карау мөмкинлеге тәтер иде, ә алар исә үзләре килә! Бу шундый зур вакыйга! Якын-тирә шәһәр-авыллар тамаша кылырга килсеннәр, бу мөмкинлектән файдаланып калсыннар иде”,– дип ассызыклый ТР атказанган артисты Резедә Сәләхова.
Комментарийлар