Мәктәпләр төзекләндерелә, укучыларны гына каян табасы?!.

Республиканың төзелеш, архитектура һәм торак-коммуналь хуҗалык министрының беренче урынбасары Алексей Фролов “Татар-информ” мәгълүмат агентлыгында узган матбугат конференциясендә эшләрнең барышы белән таныштырды.

Мәгариф өлкәсендә тагын 234 бина яңартыла, шуның 42се- мәктәп.

— Кайбер авылларда балалар кимү сәбәпле, бер-ике елдан мәктәп ябылырга мәҗбүр булачак. Мәктәп бинасы барыбер дә төзекләндереләме?- дип, “Шәһри Казан” газетасы исеменнән сорау бирдем. 

— Авылда мәктәп бинасы бар икән, ул төзекләндерелә. Дөрес, авылда балалар саны кими. Үземнең туган авылымда да мәктәп ябылды, андагы иптәшләр булган балаларын укырга Чистайга йөртә. Халыкның шәһәргә миграциясе көчле. Республиканың Авыл хуҗалыгы һәм Мәгариф министрлыклары да бергәләшеп эшләр алып бара. Авылларда уңай тормыш шартлары, хезмәт урыннары булдыру сорала,- дип җавап бирде Алексей Фролов.

7 балалар бакчасы төзекләндерелә. Биектау районының Шәпше авылындагы “Аленушка” балалар бакчасында эшләр инде ахырына җиткерелгән.

Сәламәтлек саклау өлкәсеннән төзекләндерүнең быелгы планына алынган 149 бинаның 102се төзекләндерелгән. Алабуга, Нурлат, Актаныш, Түбән Кама, Тукай, Ютазы, Әлмәт, Алексеевск, Бөгелмә, Балык Бистәсе һәм Яшел Үзән районнарындагы сәламәтлек саклау учреждениеләренең беренче звеносы биналарын төзекләндерү актив рәвештә бара.

Авылларда 34 мәдәният йорты төзекләндерелә. Питрәч, Кама Тамагы, Чүпрәле, Мамадыш, Кукмара һәм Апас районнарында эшләрне башкарып чыкканнар инде. 

Лаеш районында “Звездный” балаларның сәламәтләндерү лагеры, “Сәләт” яшьләр үзәге яңа сулыш алган. Республика программасы ярдәмендә быел янә 6 лагерь төзекләндерелә.

Кама Тамагындагы “Акчарлак” комплексында төзекләндерү эшләре тәмамланган. Республика буенча быел 15 спорт корылмасына капиталь ремонт үткәрелә.
 —Татарстан Рәисе Рөстәм Миңнеханов күрсәтмәсе буенча республикада хәрби комиссариатлар биналары төзекләндерелә. Быел да 13 хәрби комиссариат бинасы яңартыла,- диде Алексей Фролов.

Татарстанда 19 авыл хуҗалыгы бинасы, 35 социаль учреждение, 9 урман хуҗалыгы бинасы капиталь ремонтлана.