Туган илне аңлы ярату “Бөек Ватан” сүзен яза белүдән дә башлана

“Үзеңнең тарихыңны тирәнтен белү, Ватанның бөек ватанпәрвәрлек, рухи, мәдәни мирасына хөрмәтле караш үткәннәрдән дөрес нәтиҗәләр чыгарырга мөмкинлек бирә”,-ди Россия Федерациясе Президенты Владимир Путин.

Узган ел диктант язуда Россиянең 85 төбәгендә һәм 46 чит илдә 1,8 миллион кеше катнашкан. Быелгы диктант 26 мең урында (мәктәпләр, ВУЗлар, оешмалар) үткәрелә. Ленинград блокада-камалышын өзүнең 80 еллыгы, фронтовик-язучыларның юбилейлары, сугыш белән бәйле башка тарихи даталар тема итеп алынган. Тәүге халыкара тарихи диктант 2019 елда язылган.

Казандагы 155нче гимназия дә акциягә кушылды. Башта актлар залындагы очрашуда хәрби майор Артем Соколов үзенең армия хезмәттәшләренең илгә тугры булулары турында сөйләде, укучыларны Ватанны яратырга, фәннәрне тырышып үзләштерергә өндәде. 155нче гимназия директоры Наил Фазылов әйткәнчә, гимназиядә балаларны ватанпәрвәрләр итеп тәрбияләп үстерүгә зур әһәмият бирелә. Укучылар белән бергә майор Артем Соколов, республиканың мәгариф һәм фән министры урынбасары Минзалия Закирова, 155нче гимназия директоры Наил Фазылов та диктант язды.