Андрей Кондратьев: “Сәгать 8дә Татарстанда 2742 участок комиссиясе ачылды һәм эшкә кереште”

- Бүген иртәнге сәгать 8дә Татарстанда 2742 участок комиссиясе ачылды һәм эшкә кереште. Аларга хезмәтләре өчен рәхмәт белдерәсем килә һәм уңышлар телим. Исегезгә төшерәм, ике көн нәтиҗәләре буенча Татарстанда Дәүләт Думасы депутатларын сайлауларда сайлаучыларның 57,8 проценты тавыш бирде, – дип белдерде Татарстанның Үзәк сайлау комиссиясе рәисе Андрей Кондратьев журналистларга.

Сайлау участокларында видеоамералар эшендә өзеклекләр юк. Спикер ассызыклаганча, Дәүләт Думасы депутатларын сайлауларны Россия Федерациясеннән читтә уздыру өчен дөньяның 152 илендә сайлау участоклары ачылган. Татарстанның барлык участокларында видеоамералар эшли. Аларның эшендә өзеклекләр юк. БДБ илләре миссиясеннән халыкара күзәтүчеләр бүген Биектау һәм Арча районнарында булачаклар, сайлау комиссияләренең эше белән танышып, сайлаучылар белән аралашачаклар.

Рәсми мәгълүмат чыганакларын гына файдаланырга кирәк

Республика сайлаучыларына мөрәҗәгать итеп, “әгәр сездә тавыш бирү тәртибе, комиссия эше белән бәйле сорау туса, бары тик тикшерелгән, рәсми мәгълүмат чыганакларын гына файдаланырга кирәк. Сайлау системасының барлык цифрлы мәгълүмат ресурслары гамәлдә: Россия Үзәк сайлау комиссиясе, Татарстан Үзәк сайлау комиссиясе рәсми сайтлары, кайнар линия телефоннары. Оператив мәгълүматны даими рәвештә безнең социаль челтәрләрдә урнаштырабыз.

Сайлау участоклары 20:00 гә кадәр ачык. Тавыш бирү дәвам итә. Барыгызга да уңышлы көн телим!” дип белдерде Андрей Кондратьев.