Бердәм тавыш бирү көне: бушлай концерт, бүләккә машина һәм айфон

Казан шәһәре башкарма комитетының мәдәният идарәсе башлыгы Азат Абзалов сүзләренчә, чара көндезге сәгать 14.00дә башлана һәм концертка сайлаучы беләзеге булган һәр кеше бушка керә алачак. Беләзек үзенә күрә бер чакыру билеты булып тора, дип ассызыклады ул. Моннан тыш, сайлаучы беләзеге белән көн дәвамында җәмәгать транспортында да бушка йөреп булачак. 

Фестиваль кысаларында төрле мастер-класслар, «Татарстан калканы һәм кылычы» дип исемләнгән патриотик мәйданчык эшләячәк. Балалар өчен урам театры оештырыла. 

– Концерт сәгать 15.00дә башланачак. Сәхнәдә татар эстрадасы йолдызлары Гүзәл Уразова, Фирдүс Тямаев, Салават Фәтхетдинов һәм рус эстрадасыннан Алсу, Клава Кока, «Дискотека Авария» төркеме, «Новая волна» фестивалендә катнашкан Елена Фрейман, «Оберег» төркеме чыгыш ясаячак. Аерым Дмитрий Железнов капелласын билгеләп үтәсем килә, алар махсус композиция әзерләде, – дип сөйләде спикер журналистларга.   
Сүз уңаеннан: тавыш бирүдә катнашучыларны онлайн-фотоконкурста катнашырга чакыралар. Алар арасында ике Sollers ST8 автомобиле һәм унбер iPhone 16 смартфоны уйнатылачак.

«Яңа Гасыр» телекомпаниясе исә бу көнне 14 сәгать дәвамында “Мин яратам сине, Татарстан!” дигән телемарафон уздырачак. 
– Эфирга 150 кунак, шул исәптән махсус хәрби операциядә катнашучылар, халыкара олимпиада, ярышларда җиңүчеләр, яшь парлар, татар эстрадасы җырчылары чакырулы, – дип белдерде «Яңа Гасыр» телекомпаниясе генераль директоры урынбасары Светлана Кадыйрова.