Наил Мәһдиев: «Чаллы халкы сайлауларда актив, 221 меңнән артык кеше үз тавышын бирде»

19 сентябрь кичке сәгать 20:00гә булган мәгълүматлар буенча, шәһәрдә 221 меңнән артык сайлаучы тавыш биргән. Бу — сайлаучыларның 56,46 проценты, дип хәбәр итте Чаллы шәһәре мэры Наил Мәһдиев. Ул билгеләп узганча, Чаллы сайлау округы — иң зурларның берсе. Аның составына Чаллы шәһәреннән тыш, Әгерҗе, Актаныш, Менделеевск, Мөслим һәм Тукай районнары да керә. Округта барлыгы 519 мең сайлаучы исәпләнә. Шуның 391 меңе, ягъни 75 проценты, Чаллыда яшәүчеләр.

Шәһәрдә сайлау көннәрендә 173 сайлау участогы эшли. Аларның эшен 1655 участок сайлау комиссиясе әгъзасы тәэмин итә. Гомумән, сайлауны оештыруда җәмәгать тәртибен саклау, транспорт, туклану һәм башка юнәлешләрдә 2 меңгә якын кеше катнаша.

Наил Мәһдиев сүзләренчә, Чаллы халкының сайлауларда актив катнашуы шәһәрнең үзенчәлекле тарихы белән дә бәйле. Совет елларында КаМАЗ заводын һәм шәһәрне төзергә илнең төрле почмакларыннан яшь, актив һәм максатчан кешеләр килгән. Алар шәһәрдә актив тормыш рәвешен формалаштырган.

— Чаллы — битараф булмаган кешеләр шәһәре. Биредә яшәүчеләрнең гражданлык позициясе көчле, алар шәһәр тормышындагы вакыйгаларга актив кушыла, — диде ул.

Шәһәр мэры фикеренчә, сайлаучыларның активлыгына республикада гамәлгә ашырылучы программалар да йогынты ясый. Ул Чаллыда ишегалларын төзекләндерү, юлларны ремонтлау, социаль инфраструктура объектларын яңарту һәм җәмәгать киңлекләрен үстерү эшләрен мисал итеп китерде.

Наил Мәһдиев шулай ук быел Чаллының 400 еллыгын һәм беренче КаМАЗ автомобиле чыгарылуга 50 ел тулуын билгеләп үтүен искәртте. Шәһәрдәге сайлау кампаниясе дә әлеге истәлекле вакыйгалар фонында уза.