“Татарстан гаять көчле мәгълүмати һөҗүмнәргә дучар ителә”

“Илебезгә туктаусыз басым ясау шартларында Татарстан гаять көчле мәгълүмати һөҗүмнәргә дучар ителә”, - дип белдерде  Татарстан халыклары ассамблеясе Советы башкарма комитеты җитәкчесе Ренат Вәлиуллин Татарстан халыклары ассамблеясы советы һәм Татарстанда 2022-2032 елларда җирле халыклар телләренең халыкара ун еллыгына багышланган чаралар уздыру буенча оештыру комитетының уртак утырышында. Аныңча, милләтара бердәмлеккә, диннәр арасындагы татулыкка һәм Россиянең территориаль бөтенлегенә зыян китерә торган мәгълүматны тарату омтылышларына ачыктан-ачык каршы торырга кирәк.

“Кызганычка каршы, милләтара ызгышка китерүгә һәм мигрантларга тискәре мөнәсәбәт тудыруга юнәлтелгән интернет-ресурслар аз түгел. Шуңа да Татарстан Халыклар дуслыгы йорты һәм Ассамблея интернет-порталын, «Безнең йорт - Татарстан» журналын, шулай ук төрле платформалардагы каналларны, шул исәптән социаль челтәрләрне активрак кулланырга кирәк”, - дип ассызыклады ул.

Фото: https://gossov.tatarstan.ru/