Татарстанда тавыш бирү тәмамланды, тавышларны санау башланды

Сәгать 18:00гә булган мәгълүматлар буенча, Татарстанда халкының 72,49% тавыш биргән, дип хәбәр итте Татарстанның Үзәк сайлау комиссиясе рәисе Андрей Кондратьев.

Хәзерге вакытта участок сайлау комиссияләре иң мөһим этапларның берсенә — тавышларны санауга тотына. Закон бу процедураның төгәл тәртибен билгели: тавышларны санау сайлау тәмамлану белән башлана һәм нәтиҗәләр ачыкланганчы туктаусыз алып барыла.

— Бу — ачыклык принцибына нигезләнгән процедура. Тавышларны санау процессын күзәтүчеләр, кандидатлар, депутатлар, партияләрнең ышанычлы затлары һәм тиешле хокукка ия башка затлар күзәтә ала. Шулай ук аккредитацияләнгән массакүләм мәгълүмат чаралары вәкилләренә дә күзәтү мөмкинлеге бирелгән, — дип искәртеп узды Андрей Кондратьев.