Татарстанның иң өлкән кешеләренең берсе сайлау участогында гриппка каршы прививка ясаткан

Республика халкы тавыш биреп кенә калмый, сәламәтлеген дә кайгырта ала. Моның ачык мисалы – Буа районының Раково авылында яшәүче 96 яшьлек Нина Ефремова.

Нина Ефремова – хезмәт ветераны. Ул ел саен гриппка каршы прививка ясата һәм сайлауларда даими катнаша. Быел да аның өчен тавыш бирү мөмкинлеген өйдә оештыру планлаштырылган булган. Әмма Нина Егоровна сайлау комиссиясе әгъзаларын көтеп тормыйча, үзе сайлау участогына килгән.

Тавыш биргәннән соң, аны медицина хезмәткәрләре караган һәм гриппка каршы вакцина ясаган.

Олы яшьтәге кешеләр гриппка каршы вакцинация ясату өчен өстенлекле төркемгә керә. Прививка авырудан һәм грипп китереп чыгарырга мөмкин булган җитди өзлегүләрдән сакланырга ярдәм итә.