#Шоу-бизнес 18 ноябрь 2020, 16:39

Алсу Фаракшина: "Мәрхүм җырчыларга пародияләремне халык кабул итәрме?"

18 ноябрь 2020, 16:39

“Ник син миңа пародия күрсәтмисең?” дип сораучылар күп. Мин аларны аңлыйм. Бу бит реклама. Сиңа пародия ясыйлар икән, димәк, син - дәрәҗәле артист. Танылмаган кешегә пародия ясап булмый", - ди пародия остасы Алсу Фаракшина.

Скопировать ссылку

Алсу Фаракшина: "Мәрхүм җырчыларга пародияләремне халык кабул итәрме?"

- Алсу, пародияләреңне озак өйрәнәсеңме?

- Төрлечә була. Башта пародияне ясыйм да, аннары икеләнеп йөрим. Пародия ул җырлый-җырлый шомара, шуңа күрә мин аны чыгармыйча саклый алмыйм. Кайсы урынын ничек дөреслисе икәнен халык үзе төзәтә.

- Бүгенге көндә барлыгы ничә артистка пародия ясадың? Яңалары арасында кемнәр бар?

- Барлыгы 30лап артист бар. Яңалары да шактый. Ләйсән Гыймаева, мәсәлән. Аңа пародия ясаганым юк иде әле (Ләйсән булып җырлап күрсәтте).

- Мәрхүм җырчыларга пародия ясыйсыңмы?

- Ясаган идем, ләкин алар киткәч, туктаттым. Үзләре исән чакта бу хакта белделәр, каршы булмадылар. Бик матур килеп чыккан иде. Хәзер аларны исән кебек сәхнәгә алып чыгу теләгем бар. Ләкин халык ничек кабул итәр, дип куркам. Тәнкыйтьтән куркырга кирәкми, шулай да күңелдә икеләнү яши. Әлфия апа Авзаловага, Хәния апа Фәрхигә, Вәсилә Фәттаховага пародияләрем бар.

- Ә ир-атларга?

- Мин алар кебек сөйлим, ләкин җырламыйм. Мәсәлән, Салават абый, Айдар абый кебек сөйли алам.

- Бу эшчәнлегеңне ирең ничек кабул итә?

- Ул - иҗаттан ерак кеше. “Үзең беләсең, мин сиңа ышанам”, - ди ул.

- Өч яшьлек кызың Раяна да әнисе юлын сайламакчы бугай. Хәзердән үк сәхнәгә чыга.

- Беркөнне миңа ияреп концертка барды. “Синең белән сәхнәгә чыгам”, - ди. Икәү чыктык, мин җырлыйм, ул бии. Ахырдан бер куплет җыр да җырлады. Бер дә оялмый ул. Артист була калса, гаҗәп түгел. Ләкин үзе фигуралы шууга мөкиббән, кышка тимер аяк алып бирергә телибез.

- Син дә бармы оялу, курку?

- Хәзер юк инде. Каушамыйм да, курыкмыйм да. Киресенчә, сәхнәдә басып тору рәхәт. Мин һәр тамашачыны күрәм. Кемнең сагыз чәйнәгәнен, кемнең телефоннан сөйләшкәнен, кемнең йоклап утырганын – барысын да күреп торам.

Эльвира ШАКИРОВА

Кызыклы яңалыкларны күзәтеп бару өчен безнең МАХ каналына кушылыгыз.

#Татар эстрадасы #Алсу Фаракшина #пародия