Тирән сагыш: танылган алып баручы Айдар Садыйков арабыздан китте...

Соңгы елларда ул күңелен халыкка тарих җиткерүгә багышлап, танылган экскурсовод буларак та танылды, күп кенә җырчылар һәм татар артистларының якын дусты, ышанычлы хезмәттәше булды. Айдар яман шеш чире белән батырларча көрәшкән. Бу хакта matbugat. ru порталы җитәкчесе Данил Сәфәров хәбәр итте.

«Тормышны яратучан кеше булып истә калды»

Данил Сәфәров Айдар белән якынча 2010 елларда танышкан булган. Алар «туйлар. ру» сайтын бергә башлап җибәргәннәр. 

«Соңгы елларда Айдар белән телевидение студияләрендә еш күрешергә туры килде. Ул шундый зур җанлы иде: һәр тапшыруны төшерү процессында катнашкан һәрбер эшчегә — идән юучысыннан алып режиссёрына кадәр рәхмәт әйтеп, кул биреп саубуллаша иде. Чакырылган кунаклар арасында тавыш һәм видеооператорларның һәркайсына аерым игътибар күрсәтеп, рәхмәт әйтеп киткән башка андый кешене күргәнем дә, ишеткәнем дә булмады», — дип искә ала Данил тирән сагыш белән.

Шулай ук Айдарның киңәшкә юмарт кеше булганын да билгеләп үтте. «Моннан берничә ел элек минем хатыным Адилә мәҗлесләр алып бару белән кызыксынгач, Айдардан киңәш соргаан иде. Башка берәү булса, хатынымны конкурент буларак күреп: „Бу эш бик авыр, алынма“, — дияр иде.

Ә Айдар исә: „Әйдә, бер дә курыкта, булдырасың“, — дип үз киңәшләрен бирде һәм хатыныма канат куйды. Ул безнең күңелләрдә гел ачык йөзле, һәр мизгелне яратып яшәүче олы җанлы шәхес булып сакланыр», — дип сөйләде Сәфәров.

Фирдүс Тямаев: «Ышанып бетеп булмый, аның йөзеннән гел якты нур бөркелә иде...»

Татарстанның атказанган Фирдүс Тямаев та Айдар Садыйков белән таныш булган. Айдар мәҗлесләрдә җырчының үзенчәлекле образларына пародияләр ясаган. 

«Әле менә ишеттем китеп барганын, берничек тә ышанып бетеп булмый. Аның кебек гади, позитив кешеләр бик сирәк очрый. Аның беркем белән дә конфликтка кергән булмагандыр, чөнки ул һәрвакыт бары тик яхшылык турында гына уйлый иде. Әлбәттә, ул үз эшенең профессионалы булды. Сүзен-сүзгә дөрес бәйләп, мәҗлес табынында кем генә утырмасын, һәркем белән уртак тел табып, бәйрәмнең энергетикасын тоеп, эшен җиренә җиткереп эшли иде», — дип сөйләде җырчы. 

Тямаев сүзләренчә, ул Айдарның авыруын белмәгән. «Аның йөзеннән гел якты нур, шатлык бөркелә иде. Минем хәтеремдә Айдар дустым көчле энергетикалы, ныклы рухлы, чын Кеше булып калачак. Урыны оҗмах түрендә булсын...»
Каушау һәм сагыш катыш авыр көн... Бүген Казан халкы Айдар Садыйковы соңгы юлга озатты. Шәхеснең соңгы тукталышы «Курган» зираты комплексы булды.