Казан чаңгы марафонына 700 спортчы җыела: Юдинода зур узыш

Казанда тәүге чаңгы марафоны 1968 елда Аккош күлендә оештырылган булган.

– Россиянең Калининградтан башлап Владивостокка кадәрге төбәкләреннән спортчылар килә, барлыгы 700 кеше көч сынаша. Узышлар аралыгы – 5, 30 һәм 50 чакрым. Приз фонды – 800 мең сум һәм истәлек медальләре. Бүләк беренчел түгел, чаңгыга басу – сәламәтлеккә бару ул. БРИКС илләреннән Марокко, Алжир, Мисыр һәм Әзәрбайҗан спортчылары да чыгыш ясый. Татарстан Рәисе Рөстәм Миңнеханов, Казан мэриясе спортны үстерүгә зур игътибар бирә, – диде Казан шәһәр Башкарма комитетының физкультура һәм спорт комитеты рәисе Линар Гарипов “Татар-информ” мәгълүмат агентлыгында үткәрелгән матбугат конференциясендә.

Татарстанның чаңгы узышлары федерациясенең эшләр идарәчесе Денис Блохин әйткәнчә, спорт бәйрәме программасы бай. Тамашачылар өчен Юдино бистәсе юлындагы “Паровоз” һәйкәле янындагы парковкадан 15 минут саен автобус-шаттл йөреп торачак.

Спорт остасы Глеб Ретивых һәм 2 мәртәбә дөнья чемпионы Сергей Устюгов: “Татарстанда спорт игътибар үзәгендә, корылмалар яхшы. Казан чаңгы марафонына бик теләп катнашырга киләбез. Спорт белән шөгыльләнегез”, – дип, бер үк сүзләрне әйттеләр.

– Казан чаңгы марафонына гел кечкенә бүләк кыстырып киләм, аны балаларга тапшырам. Викторинада дөрес җавап кайтарган балага быел да бүләгем бар. Спортчы биргән бүләк гомерлек истәлек бит ул, – диде Сергей Устюгов.

Билгеле булганча, Татарстанда «Россия спорты» илкүләм проекты гамәлгә ашырыла.