Татарстан һәм Архангельск өлкәсе хатын-кыз депутатлары хезмәттәшлек турында килеште

Бүген парламентта Дәүләт Советының «Мәрхәмәт – Милосердие» хатын-кыз депутатлары берләшмәсе һәм Архангельск өлкәсе Хатын-кызлар депутатлар палатасының уртак утырышы узды. Утырышта катнашучылар төбәкләрдә социаль сәясәтне гамәлгә ашыру мәсьәләләре турында фикер алыштылар, хатын-кызлар җәмгыятьләре эшчәнлеге турында сөйләштеләр, шулай ук социаль әһәмиятле проектларны гамәлгә ашыру буенча үз тәҗрибәләре белән уртаклаштылар. Утырышны үткәрү инициативасы белән Дәүләт Думасы депутатлары – Гаиләне яклау, ата-ана һәм балачак мәсьәләләре комитеты рәисе урынбасары Елена Вторыгина һәм профильле комитет әгъзасы Татьяна Ларионова чыккан. Дәүләт Советы җитәкчелеге исеменнән хатын-кызлар депутатларны Дәүләт Советы Рәисе урынбасары Марат Әхмәтов сәламләде.

Утырышны ачып, Марат Әхмәтов Архангельск өлкәсе Хатын-кыз депутатлар палатасы әгъзаларын Архангельск өлкәсе депутатлары Собраниесенең беренче чакырылышын сайлауның 30 еллыгы белән котлады. Дәүләт Советы Рәисе урынбасары Татарстанның социаль-икътисадый үсеше мәсьәләләренә тукталды, 2023 елда республиканың тулаем төбәк продукты 4 трлн сумнан артып китүенә басым ясады. 

Марат Әхмәтов «Мәрхәмәт – Милосердие» парламент берләшмәсенең социаль әһәмиятле мәсьәләләрне хәл итүгә керткән зур өлешен аерым билгеләп үтте. "Безнең хатын-кыз депутатлар бик актив, алар тарафыннан 20дән артык социаль әһәмиятле закон проекты кертелде, 110дан артык инициатива эшләнде, Идел буе федераль округы төбәкләренең закон чыгару җыелышы хатын-кыз депутатлары белән уртак эш җайга салынды», – дип басым ясады парламент Рәисе урынбасары. Марат Әхмәтов шулай ук Архангельск өлкәсе депутатларына Татарстанда тормышка ашырыла торган проектлар белән кызыксынулары өчен рәхмәт белдерде.

"Татарстан – иң яхшы тәҗрибәләрне үзләштерә торган урын, – дип ассызыклады Дәүләт Думасының Гаиләне яклау, ата-ана һәм балачак мәсьәләләре комитеты рәисе урынбасары Елена Вторыгина. – Субъектлар сезнең республика территориясендә иҗтимагый берләшмәләрнең ничек эшләвен, нинди кызыклы проектлар тормышка ашырылуын карарга тиеш, ә без визит барышында үзебезнең уңай тәҗрибә белән уртаклашырга әзер».

Елена Вторыгина билгеләп үткәнчә, Архангельск өлкәсе территориясендә Хатын-кызлар палатасы катнашында ата-аналар берләшмәләрен берләштерүче «Поморья гаиләсе», хатын-кызларга консультатив һәм белем бирү ярдәме күрсәтүче «Хатын-кызлар диалогы», «Хыяллар чынга аша», «Балачак территориясе» кебек төбәк проектлары тормышка ашырыла. «Без, Татарстан кебек үк, төп социаль юнәлешләр буенча иң яхшы эшләнмәләребезне күрсәтергә әзер, һәм без ике субъект депутатларының хезмәттәшлек итүен бик телибез, чөнки бу яңа закон чыгару инициативаларын һәм тәкъдимнәрен эшләргә мөмкинлек бирәчәк», – диде Елена Вторыгина журналистлар белән аралашканда.

"Гаилә, ана булуны һәм балалыкны яклау проблемаларын нәкъ менә хатын-кызлар тирәнрәк аңлый ала, шуңа күрә бу мәсьәләләр хатын-кыз депутатлар берләшмәләре көн тәртибендә үзәк урынны алып тора, – дип ассызыклады Дәүләт Думасы депутаты Татьяна Ларионова. – Архангельск өлкәсе Хатын-кызлар палатасының безгә кертергә мөмкин булган эш формалары күп. Бүген Татарстан парламенты диварларында, шулай ук республика территориясендә уза торган бу очрашу бик файдалы булачак, чөнки ике төбәкнең хатын-кыз депутатлары уртак мәсьәләләрне хәл итәләр, безнең сөйләрлек эшләребез дә бар, киләчәктә халкыбыз файдасына эшләү өчен уртаклаша алырлык тәҗрибә дә бар».

Татьяна Ларионова демографик сәясәт мәсьәләләренә аерым тукталды. Ул, аерым алганда, Татарстанда аерылышулар саны Идел буе федераль округының башка төбәкләренә караганда азрак булуын билгеләп үтте. Әмма тулаем алганда ил буенча тискәре тенденция саклана. Хәзерге вакытта, Татьяна Ларионова әйтүенчә, ил алдында торган чакырулар Россиянең барлык төбәкләре өчен дә бер үк. Аларның күбесе гаилә белән бәйле. «Кызганычка каршы, күп кенә гаилә кыйммәтләре югала», – диде ул. Шул ук вакытта соңгы елларда Россия Президенты Владимир Путин дәрәҗәсендә берничә әһәмиятле документ, аерым алганда, рухи һәм әхлакый кыйммәтләр турында указ кабул ителде.

Дәүләт Советының «Мәрхәмәт-Милосердие» депутатлар берләшмәсе җитәкчесе Алсу Нәбиева парламент берләшмәсе эшчәнлеге турында җентекләп сөйләде. Дәүләт Советында хатын-кыз депутатлар берләшмәсе 2009 елда оештырылган. Хәзерге вакытта аңа 16 хатын-кыз депутат керә, алар гражданнарга социаль ярдәм, ана булуны һәм балаларны яклау, гаилә һәм никах институты, социаль һәм яшьләр сәясәте, мәгариф, сәламәтлек саклау, спорт һәм башкалар мәсьәләләрне күзәтәләр. Алсу Нәбиева әйтүенчә, берләшмә «Бердәм Россия» фракциясе утырышында расланган нигезләмә нигезендә эшчәнлек алып бара, анда ел саен башкарылган эш турында хисап белән чыгыш ясый.

Барлык дәрәҗәдәге хатын-кыз депутатлар белән нәтиҗәле хезмәттәшлек итү максатыннан республиканың һәр муниципаль берәмлегендә шундый берләшмәләр оештырылган. 2022 елда «Мәрхәмәт-Милосердие» берләшмәсе һәм республика муниципаль берәмлекләренең хатын-кыз депутатлар берләшмәләре арасында хезмәттәшлек һәм үзара эшчәнлек турында килешү төзелгән һәм имзаланган. «Мәрхәмәт- Милосердие» берләшмәсе инициативасы белән Идел буе федераль округы хатын-кыз депутатлары белән социаль мәсьәләләр буенча дискуссия мәйданчыгы булдырылган. "Берләшмә эшенең төп юнәлеше булып социаль мәсьәләләрне хәл итүгә юнәлдерелгән закон чыгару эшчәнлеге тора. Берләшмә әгъзалары катнашында 5 ел эшләү дәверендә 86 закон проекты кертелде, аларның күбесе мәгарифкә һәм социаль ярдәмгә кагылышлы», – дип белдерде Алсу Нәбиева.

Утырышта Татарстанда балалы гаиләләргә социаль ярдәм чаралары ничек тормышка ашырылуы турында хезмәт, мәшгульлек һәм социаль яклау министры урынбасары Юлия Абдреева, мәгариф һәм фән министры урынбасары Алсу Әсәдуллина һәм яшьләр эшләре буенча министрның беренче урынбасары Софья Мостафина сөйләделәр. 

Алсу Әсәдуллина билгеләп үткәнчә, республиканың барлык профильле министрлыклары балалы гаиләләргә ярдәм күрсәтү һәм аларга ярдәм итү буенча тыгыз хезмәттәшлек итә. 

Архангельск өлкәсе хатын-кызлар палатасы вәкилләре, үз чиратында, үз өлкәләрендә социаль әһәмиятле проектларны гамәлгә ашыру турында сөйләделәр.

Утырыш ахырында «Мәрхәмәт-Милосердие» хатын-кыз депутатлар берләшмәсе һәм Архангельск өлкәсе Хатын-кызлар палатасы арасында хезмәттәшлек турында килешү имзаланды.

Архангельск өлкәсе хатын-кызлар депутатлар палатасы әгъзалары Татарстанга эш визиты белән килде. Бүген кунаклар «Адымнар» полилингваль комплексында һәм «Казан» Гаилә үзәгендә булырга ниятлиләр. Визит программасында шулай ук Лаеш районының кайбер социаль объектларына бару планлаштырыла.

ТР Дәүләт Советы матбугат хезмәте