Төзелешләр башкарган кеше яхшыга өметләнә

Журналистлар белән очрашуында республиканың төзелеш, архитектура һәм торак-коммуналь хуҗалык министры Марат Айзатуллин:”Татарстан Рәисе Рөстәм Миңнеханов төзелеш тармагына куйган быелгы бурычлар үтәлде”, – диде.

Татарстанда төзелеш тармагында 86 мең кеше эшли. 2024 елның ун аенда ук 3 миллион 200 мең 304 квадрат метр торак төзеп тапшырылган. Социаль ипотека алымында күп фатирлы 56 йорт төзелә, аның 31е инде тәмамланган. Халык үзе дә тырыша, 17 мең 37 шәхси йорт төзелгән. Торак-коммуналь хуҗалык тармагында 63,6 миллиард сумлык хезмәт күрсәтелгән.

– Бездә 44 республика программасы, 6 – илкүләм һәм 4 дәүләт программасы гамәлгә ашырыла. 2021 елдан башлап ел саен 3 миллион квадрат метрдан артык торак төзеп тапшыруга ирешеп барабыз, – диде Марат Айзатуллин.

Быел 8 мәктәп һәм 3 уку корпусы, 2200 урынга 10 балалар бакчасы сафка бастырылган, 236 мәгариф учреждениесенә капиталь ремонт ясалган.
– Татарстан Рәисе Рөстәм Миңнеханов башлангычында “Безнең ишегалды” республика программасын гамәлгә ашыру дәвам итә. 4339 ишегалды яңартылды, әле тагын 1550 ишегалдын төзекләндерергә кирәк, – диде министр.

Парклар һәм скверлар төзекләндерелә. Казанда Казансу елгасы буенда “Елмай” балалар паркы файдалануга тапшырылды, ул быелгы зур проектларның берсе булды. Камал театрының яңа бинасы төзелеше якын көннәрдә тәмамланачак.
– Татарстанда торак йортлар, социаль учреждениеләр, Казанда метро төзелешләре бара. Төзелешләр бара икән, димәк, тормыш бара, – диде Марат Айзатуллин.