Сиңа чәчәк бүләк итәм, Күктән йолдыз алып бирәм

Бүген язның иң күркәм, иң матур һәм иң назлы бәйрәме - 8 Март. Бу көнне без яраткан кешеләребездән, якыннарыбыздан бүләк алабыз. Ә хатын-кызлар өчен бүләкләрнең иң көтеп алынганы, әлбәттә инде, чәчәк бәйләмнәре. Чөнки алар, гүзәл затларыбыз кебек үк, берсеннән-берсе купшы, матур һәм нәфис. Әмма чәчәкләрнең гомерләре генә кыска шул, ә без исә аларның күзләребезне мөмкин кадәр озаграк иркәләвен телибез.
Вазага утыртыр алдыннан чәчәк сабакларының аскы яфракларын кисеп алыгыз, аннан үткен пычак ярдәмендә сабакның үзен дә бер сантиметрга авыш итеп кыскартыгыз.
Чәчәкләрнең күбесе җылылыгы бүлмә температурасыннан азрак булган суда да үзләрен яхшы хис итә, әмма бу нәркис белән лаләгә кагылмый, алар җылы суда яхшырак саклана. Чәчәкләрнең суын гел алыштырып торырга да онытмагыз. Ә менә канәферләрнең суын сирәк алыштырырга да була. Чәчәкне судан алгач, аларның сабакларын бераз кыскартыгыз.
Суга стрептоцид, аспирин (6 литр суга 1 төймә) яки бор кислотасы (1 литр суга 0,1 гр) салыгыз. Алар судагы микроорганизмнарны юк итә һәм черү процессына каршы тора.
Кайбер чәчкәләр суны башкалар белән бүлешергә яратмый, роза, канәфер, орхидея, лилия, нәркис, мәк, ландышларны вазага үзләрен генә утыртыгыз, алай иткәндә алар озаграк саклана. Чәчәк утыртылган вазаны җиләк-җимеш янында да тотарга ярамый. Ни өчен дигәндә, соңгылары черү продукты - этилен бүлеп чыгара.
Чәчәкләр җиңелчә генә сула башласа, бер савытка аз гына кайнар су салыгыз да аңа берничә секундка чәчкәнең сабагын тыгып торыгыз. Кайнар су капиллярларны киңәйтә һәм тормыш эшчәнлеге процессын активлаштыра.
Югарыдагы киңәшләр барлык төр чәчәкләргә дә кагыла, әмма кайберләренең үз сере бар. Әйтик, гладиолуслар озаграк торсын өчен аларның сабакларының аскы өлешен энә белән тырнап чыгарга кирәк, болай иткәндә суны яхшырак сеңдерәләр. Фиалканы иң элек башы белән суга тыгып алалар, аннары гына, селкетеп суын агызгач, вазага утырталар. Калла һәм гербераның киселгән урынын башта тоз белән эшкәртергә кирәк. Ә ирис белән лалә чәчәге утыртыласы суга суыткычтан берничә кисәк боз салыгыз. Пионның бөресе тизрәк ачылсын дисәгез, аны кайнар суга утыртыгыз. Альстромерия бернинди тәрбия таләп итмичә дә ике атна тора ала. Бувардия исә үтәли җилдән курка.
Чәчәкләр кибетендә порошок сыман кризал дигән өстәмә азык сатыла. Аның ярдәмендә дә чәчкәнең гомерен озайтып була. Пион бөресе тизрәк ачылсын дисәгез, аны кайнар суга утыртыгыз.