Алабуга районындагы янгын: «Әтисен алып чыгарга дип кереп киткән, әмма өлгермәгәннәр...»

Алабуга районының Татар Дөм-Дөме авылында әтиле-уллының янып үлүе турында хәбәр иткән идек. Бу хәл бүген төнлә сәгать икеләрдә булган. Исемен әйтергә теләмәгән авылдашлары әйтүенчә, фаҗига булыр алдыннан 33 яшьлек ир-ат хатыны белән аның әнисен өйдән куып чыгарган. Такси белән алар икенче бер районга китеп барганнар. Гомерләре бетмәгән булгандыр, шуның белән исән калганнардыр, ди әңгәмәдәшем. "Бу гаилә аракы белән дус иде. Җиде балалары бар иде. Бишесе хатынының ияртеп килгән баласы, ә икесе шушы ирдән туган балалар. 
«Ата-ана хокукыннан мәхрүм ителгәннәр. Балалары әти-әниләре белән яшәми, - дип сөйләде әңгәмәдәшебез, - Ир документларын, ниндидер инструментларын чыгарырга өлгергән. Әтисен алып чыгарга дип кереп киткән, әмма өлгермәгәннәр. Гәүдәләрен ишек төбеннән табып алганнар. Үләр алдыннан абыйсына шалтыратып, аңардан  үзе өчен дога кылуын сораган дип тә сөйлиләр. Үләсен сизгән, күрәсең".