«Гаилә язмышы-ил язмышы», дигән сүз. Шуңа күрә илебезнең киләчәген сайлыйбыз»

Лесхоз егете Илназ Зиннәтуллин белән Байлар Сабасы кызы Ләйсирә Галәвинаның никахлары теркәү Россия Федерациясе Президентын сайлау көненә туры килгән. Бу хакта "Саба таңнары" яза. 

“Законлы никахлашу тантанасын Россия Федерациясе Президентын сайлау көнгә билгеләү мөмкинлеген белдек тә, икебез дә киңәшләшеп, дәүләт хезмәтләренең федераль порталы аша ЗАГС бүлегенә  гаризабызны юлладык. Яңа тормышка аяк баскан көнебезне бик истәлекле, якты итәсебез килде. Район ЗАГС бүлегендә безнең бу теләгебезне бик хуплап каршы алдылар. Бу көнне сайлавыбыз  икебез дә сюрпризлар яратканлык белән дә бәйледер”, – ди яшьләр. 

Район гражданлык хәле актларын теркәү бүлеге җитәкчесе Гөлнар Шәфыйкова яшь парга гаиләнең беренче документын– язылышу турында таныклык тапшырган. Яңа гаиләне муниципаль район башлыгы урынбасары Расих Закирҗанов  тәбрикләгән. 
Икесе дә үрнәк гаиләдә тәрбияләнгән яшь пар ике ел элек инстаграм аша танышып, дуслыклары мәхәббәткә китергән.  

"Икебез дә Саба районда туып үстек, әти-әниләребез дә биредә хезмәт куя. Районыбызда 14 яше тулган укучыларны эшкә урнаштыру мөмкинлеге булдырылган. Тормыш иптәшем Илназның эшмәкәр булып китүендә дә әлеге проектның роле зур булгандыр", –ди Ләйсирә.

– Ләйсирәнең уңган-булган, тырыш булуы җәлеп итте, аның белән гаилә корып яшәү бик җиңел булыр дип уйладым", –ди Илназ.

Яшьләрнең бәхетле көннәре белән уртаклашырга әти-әниләре, туганнары да килгән.

"Гаилә язмышы-ил язмышы", дигән сүз. Шуңа күрә илебезнең тынычлыгын, киләчәген сайлыйбыз. Илебездә тынычлык булса – гаиләләр дә бәхетле була дигән сүз", – ди яңа гаилә корган  Зиннәтуллиннар.