Һәрберсе үз тарихы, гаилә традициясе белән уртаклаша

Студиядә төп кунаклар – үрнәк гаиләләр. Һәр гаиләнең үзенчәлекле тарихы бар. Марафонны Айгөл Хәйруллина, Идел Кыямов, Светлана Звонорева, Илдар Кыямов алып бара. 

Бу көн бәйрәм көне инде

ТНВ студиясендә бүген аеруча җылы. Чөнки биредә  үрнәк шәхесләр, гаиләләр, династияләр җыелды. Студиягә Бер-бер артлы кунаклар килеп тора. Һәрберсе үз тарихы, гаилә традициясе белән уртаклаша. Нигъмәтуллиннар гаиләсендә мәсәлән буыннан-буынга тапшырылучы гармун бар.

– Гармунга 150 ел. Бабабыз әтиебезгә калдырган, әти безгә калдырды, мин инде оныгыма тапшырам. Гаиләдә алты малай үстек. Барыбыз шушы гармунда уйнады. Зур сәхнәләрдә чыгыш ясамадым, әмма оныгым Инсаф бу хыялымны чынга ашырды, шөкер - ди Гомәр Нигъмәтуллин. 

Сайлауга да Нигъмәтуллиннар бергә барганнар икән. 

– Элек әти-әнигә ияреп сайлауга бара идек, хәзер үзебез балаларны җыеп сайлау участогына барабыз. Бу көн бәйрәм көне инде. Быел да өч буын берләшеп бергә сайлау участогына бардык, – ди Әдилә Нигъмәтуллина. 

Нигъмәтуллиннарның тагын бер гаилә традициясе – Нәсел бәйрәме. Һәр ел июньннең соңгы ял көннәрендә бар туган-тумача туган низендә җыела. 

– Без көн саен кичке ашны бергә ашыйбыз. Елына бер тапкыр 238 кеше җыелышып нәсел бәйрәме үткәрәбез. Һәрвакыт бер генә теләк – икенче елга да шушы тулы составта очрашсак иде, - ди Әдилә ханым. 

Телемарафон студиясендә Әлмәттән 10 балалы Шамсуллиннар гаиләсе дә кунак булды. 

– 10сы да үзебезнеке, Аллаһка шөкер.  Балалар күбрәк булган саен җаваплылыкны ныграк сизәсең. Ничек эшлим икән дип уйларга вакыт юк. Үзең ничек дөрес дип саныйсың шулай эшлисең. Иң зурысына - 17 яшь, иң төпчегенә - 1 яшь. Өлкәнрәкләре бик ярдәм итә. Төпчекләргә үз тәҗрибәләрен дә җиткерә. Безнең өй умарта оясы кебек: бердәм, әмма бик тавышлы (көлә). Гел гөжләп торабыз. Балалар гел хәрәкәттә булырга тиеш. Без күнектек инде. Сау-сәламәт кенә булсыннар, - ди Ләйсән Шамсуллина.

Гаилә башлыгы Фоат Шамсуллин  сүзләренчә, ишле гаиләне туендыру кыен түгел.

– Эшләп торабыз бит, дәүләт ярдәмен дә тоябыз. Һәр бала бу дөньяга үз ризыгы белән килә. 10 балабыз булыр дип алдан планлаштырмадык. Бала туу – зур бәхет, ә бездә бәхет бик күп, - ди ул.