Янгын чыгып, дүрт балалы гаилә йортсыз калган

Йорт белән бергә мунча, гараж, ике машинабыз да янып көлгә әйләнде, документлардан кала берни алып чыга алмадык, ди Лилия Пушкарева. 
Владимир белән Лилия дүрт бала тәрбиялиләр. 14 яшьлек олы кызлары үзләренеке, калган өчесе Лилиянең үги абыйсының балалары. Пушкаревлар аларны опекага алган. Ул вакытта иң кечкенәсенә нибары 7 ай гына булган. Хәзер инде аңа 9 яшь. Калганнары – 11, 12 яшьлекләр. 

– Иң мөһиме барыбыз да исән-сау. Олы кызыбыз төтен белән агуланып өлгергән булган, хәле яхшы, бәлки хастаханәдән чыгарырлар да инде, – ди Лилия.  
Тәрәзәдән фейерверк тавышы ишетелә дип уянып киткән Владимир иң беренче булып утны күреп ала. Мунча түбәсеннән чыккан очкыннар шунда ук ут көлтәсенә әверелеп, аның ялкыннары гаражга күчкән була. 

– Ул көнне бик арыган идек. Кырык көн элек кенә Владимирның әнисен җирләдек. Соңгы дүрт елда ул бездә яшәде. Аны искә алу мәҗлесе үткәрдек. Өйдә гардероб бүлмәсе ясаган идек. Ул көнне киемнәре карап, аралап куйдык. Балаларның кечкенәргән киемнәрен хәйрия оешмаларына җибәрергә дип аерым тутырып куйган идек. Алары да янды. Янгын сүндерү машинасын кырык минут көтәргә туры килде. Өебез күз алдыбызда янып бетте. Мин өйдә онлайн турагент булып эшлим. Яңа алган компьютерым да, телефоным да янды, – Лилия.
Пушкаревларга опекадан вакытлыча яшәү урыны булачак, дип вәгъдә иткәннәр. 
– Бик күп кеше ярдәм кулы сузды. Киемнәр китерделәр. Төзелеш материаллары да алып килергә әзер кешеләр бар. Барысына да бик зур рәхмәт! – ди Лилия.
Күп балалы гаиләгә булышырга теләүчеләр өчен Лилия Пушкареваның телефон номеры: 89520454621. Тинькофф картасына беркетелгән.