Матурлыкка 920 миллион сум акча бүлеп биреләчәк

Кечкенә шәһәрләр арасында ял итү урыннарын төзекләндерүгә грантлар бирү буенча Россия күләмендәге конкурста республиканың 14 районы җиңүче дип танылды. Җиңгән төбәкләр тәкъдим иткән проектларны гамәлгә ашыру өчен барлыгы 920 миллион сум акча бүлеп биреләчәк.

Татарстан Президентының парклар һәм скверлар буенча ярдәмчесе Наталия Фишман әйтүенчә, әлеге грантлар күп идеяләрне тормышка ашырырга ярдәм итәчәк. Әйтик, Минзәләдә Екатерина күпере халыкның йөрәген күптән әрнетеп торган. Хәзер Минзәлә яр буен төзекләндерүгә 55 миллион сум грант бирелгәч, күперне дә яңарту мөмкинлеге туа. Грантлар турында белгәч, күп кенә районнарда инвесторлар да җанланып киткән. Шулай ук урта һәм кече эшмәкәрләргә дә эшләрен җәелдерү өчен юллар ачыла. Нурлат шәһәрендә Карл Маркс урамын төзекләндерү өчен, мәсәлән, грантта откан 80 миллион сум гына җитмәячәк, бу эштә эшмәкәрләр дә теләп ярдәм кулы сузачаклар икән. Тәтешнең шәһәр буасын, Әгерҗенең «Орешник» паркын, Кукмарада бертуган Комаровлар йортын яңарту өчен 55 мең сум грант бүленгән. 14 бәхетле төбәк арасында Алабуга шәһәре дә бар. Анда Ленин мәйданын ремонтлау өчен 50 миллион сум акча каралган. Алабуга муниципаль районы башлыгы урынбасары Зөлфия Сөнгатуллина әйтүенчә, мәйданны төзекләндергәндә беренче чиратта тарихилыкны саклап калуга басым ясалачак. Асфальтны XIX гасырны хәтерләткән таш юлга алыштырачаклар, автобус тукталышы тирәсен яшеллеккә күмәргә, 17 меңгә якын төп үсенте утыртырга, яңа утыргычлар булдырырга исәплиләр.

Ә менә Чистай икенче Алабуга булып куймагае. Конкурста җиңеп чыгып 100 миллион грант отуыннан тыш, БРИКС илләрне үстерү Яңа банкы 38 миллион доллар бүлеп бирергә җыена. Татарстан Президенты Шанхайга эшлекле сәфәргә баргач, бу хакта килешеп кайткан. Әлеге акчага Чистайда ун яңа музей барлыкка киләчәк, тарихи биналарны төзекләндерәчәкләр, пристаньне яңартачаклар, 2025 елга кадәр тагын күп кенә башка ремонт эшләре башкарылачак, ди.

Биләр үзенә бүлеп бирелгән 50 миллион сумга – Изгеләр чишмәсен һәм күлне, Болгар 30 миллионга – Пионерлар урамын, Баулы 80 миллион сумга – «Нефтьчеләр» паркын, Азнакай шул ук суммага Сөембикә урамын яңартачак. 100әр миллион сум грант откан Лениногорск һәм Бөгелмә дә танымаслык булып үзгәрәчәк, ди. Лаешның елга ярлары диңгез буен хәтерләтәчәк. Монда инде төзекләндерү эшләре башланган. Кыскасы, һәр район Казаннан ким булмаячак. Җирлекләрдә инфраструктуралар үсеше авылларга яшьләрне җәлеп итүдә дә тәэсир итми калмас дип ышаныйк.

Илдар Мөхәммәтҗанов фотосы