Сайлауларда iPhone 17 откан Альмир Фәрухов: «Көтелмәгән куаныч»

Аңа приз буларак iPhone 17 тапшырылуы көтелә. Җиңүче исеме «Татарстан Алга» ВКонтакте бергәлегендә игълан ителде.

Альмир Фәрухов сайлауда Арча районының Кәче авылында катнашкан. Ул иртәнге сәгать 8дә, сайлау участоклары ачылуга ук, тавыш бирергә барган.

— Айфон оттым менә! Дөресен генә әйткәндә, җиңәрмен дип бөтенләй уйламаган идем. Көтелмәгән куаныч булды! Кызым беренчеләрдән булып күреп алды. Бүген иртәнге сәгать 8дә, сайлау участоклары ачылуга ук, сайлауга барган идек. Эш урыныннан җитәкчем дә искә төшерде, йокыдан уятып әйтте, — дип көлә Альмир.

Әлеге яңалыкны белеп алу белән аңа бөтен танышлары яза башлаган. 

— Элекке сайлауларда да катнашкан идем. Ә бу юлы бәхет елмайды. Сөенечем бик зур! Тормыш иптәшемә күптән инде айфон бүләк итәсем килә иде. Аллаһы Тәгалә кушып, бүген менә үзебез оттык. Хатынымны сөендерергә дә насыйп булсын! — ди ул.

Фотоконкурс 18, 19 һәм 20 сентябрьдә Татарстанда уза. Катнашучыларга гаилә белән сайлау участогы фонында фотога төшеп, аны ВКонтакте социаль челтәрендәге шәхси битендә #Всейсемьейнавыборы һәм #ТатарстанАлга хэштеглары белән урнаштырырга кирәк.

Конкурс кысаларында барлыгы 33 iPhone 17 һәм өч Sollers ST8 автомобиле уйнатыла. Җиңүчеләрне билгеләү һәм призлар уйнату «Татарстан Алга» ВКонтакте бергәлегендә трансляцияләнә.

Бүген кич Sollers ST8 автомобиле өчен чираттагы уен узачак.