#Язмалар 17 декабрь 2021, 15:53

Татар китабы ресторанлы да булды

17 декабрь 2021, 15:53

Татарстан башкаласының үзәгендә, төгәлрәк итеп әйтсәк, элеккеге “Матбугат йорты” бинасындагы “Ногай” кунакханә комплексында “Китап club” әдәби рестораны ачылды. Мондый форматтагы ресторан Казанда моңа кадәр юк иде. Аның бу бинада ачылуы очраклы түгел: «Матбугат йорты» гомер-гомергә әдәбиятчылар, журналистлар, гомумән, зыялыларның яраткан урыны булган.

Скопировать ссылку

Шушы бинада Габдулла Тукай клубында әдәби кичәләр, очрашулар узган, язучы-шагыйрьләребез чыгыш ясаган. Әлеге бина үз чорында Казандагы бөтен нәшриятларны һәм басмаханәне сыйдырырлык итеп төзелгән булган. Күп еллар дәвамында биредә китап кибете эшләп килгән.

Ресторанның төп үзенчәлеге шунда: кунакларга төрле тәмле ашамлыклардан тыш, кызыклы китап басмалары да тәкъдим ителәчәк. Монда 500дән артык төрдәге китаплар бар. Аларны ресторанда укырга, ә ошаган басманы сатып алырга мөмкин булачак. Биредә шулай ук төрле чаралар – язучылар һәм шагыйрьләр белән очрашулар, яңа китаплар презентацияләре, тематик кичәләр үткәрү планлаштырыла.
- Нәкъ бер ел элек “Татмедиа” бинасында “Әдәби кафе” ачкан идек. Ул укучыларның шундый яраткан урынына әйләнде. “Китап club” рестораны да аннан калышмас, дип уйлыйм, - диде Татарстан китап нәшрияты генераль директоры Илдар Сәгъдәтшин.

Кызыклы яңалыкларны күзәтеп бару өчен Т елеграмга кушылыгыз.